Izgi is-sharanyń shymyldyǵy Nurǵısa Tilendıev atyndaǵy akademııalyq folklorly-etnografııalyq «Otyrar sazy» orkestriniń súıemeldeýindegi «Ata tolǵaýy» kúıimen ashyldy. Memleket basshysy Qasym-Jomart Toqaevtyń quttyqtaýyn Prezıdent keńesshisi Málik Otarbaev oqydy.
Saltanatty is-shara barysynda Premer-mınıstrdiń orynbasary – Mádenıet jáne aqparat mınıstri Aıda Balaevanyń, Almaty oblysy ákiminiń, Almaty qalasy ákiminiń quttyqtaýy oqyldy.
Aqyn mereıtoıyna arnalǵan dúbirli keshti Jambyl aýdanynan arnaıy kelgen ónerpazdar bastap, sahnalyq qoıylym saltanatty keshtiń árin asha tústi. «Jambyl ata eli» ánin Jambyl aýdandyq mádenıet úıiniń solısteri oryndap, aqynnyń «Jaz» atty ǵajaıyp týyndysyn halyqaralyq jáne respýblıkalyq baıqaýlardyń laýreaty Janqoja Aıapov shyrqady. «Otyrar sazy» orkestriniń súıemeldeýimen Myńjasar Mańǵytaevtyń «Jambyl jaılaýy» týyndysy keshtiń kórigin qyzdyra tústi.
Án men jyr shyrqalǵan keshte aqyn shyǵarmashylyǵyna arnalǵan estelikter de aıtyldy. Búginde jyrlary álemniń kóptegen tiline aýdarylyp, halqyn dúıim dúnıege tanytqan Jambyl murasyn nasıhattaý haqynda pikir bildirip, quttyqtaýyn arnaǵan Jazýshylar odaǵynyń basqarma tóraǵasy Mereke Qulkenov «30-jyldary dál Jambyldaı bedeli kóterilgen aqyn bolǵan joq. Jambyl jyrlarynyń arqasynda qazaq elin álem tanydy. Aqynnyń bir ǵana «Lenıngradtyq órenderim» atty jyry maıdan dalasynda qanshama júrekterge jylý berip, demeý boldy. Qazaq sóziniń qudiretin túsindirgen Jambyldaı dara tulǵanyń murasyn urpaqtan-urpaqqa jetkizýdiń máni tereńde jatyr. Kezinde aqyn aýylyna joly túskender Jambyl babamyzǵa sálem berip, batasyn almaı ketpegen. Endeshe aqyn aýylyndaǵy mýzeıdi, baý-baqty qal-qaderimizshe túgendep, damyta berý árqaısymyzǵa paryz», dep atap ótti.
TÚRKSOI túrki mádenıeti men ónerin damytý halyqaralyq uıymynyń bas hatshysy, Qyrǵyzstannyń halyq jazýshysy Sultan Raev: «Ár dáýirdiń sózin sóıleıtin, kúıin kúılep, jyryn jyrlaıtyn jyraýlary bolady. Olar zamannyń tamyrshysyndaı ultyna ulanǵaıyr paıdasyn tıgizedi. Ondaı tulǵalarǵa degen qurmettiń jemisin sol zamandaǵy halyq jaqsy biledi. Búginde 180 jyldyǵy toılanyp jatqan Jambyl Jabaev ǵasyr jasap, halqynyń jyraýy, batagóı abyzy, ańyzyna aınaldy. Daýyl-quıyndaı jyrlarymen adamzatty shyǵarmashylyǵyna arqaý etti. Halqyna ónerdi, eńbekti nasıhattady. Kóne zaman men jańa dáýirdi tarazylap, halyq qamyn oılap, muńyn muńdady. Júz jyldyq ǵumyrynda abyroıly eńbegin eliniń ıgiligine arnady. Ondaı tulǵanyń ómirge sırek keletini anyq. Halqy úshin kúıindi, halqy úshin súıindi. Bolashaq órenderge únemi ósıet aıtyp, jyryna qosyp, batasyn berip, keler kún jaqsylyǵynyń jyrshysy boldy. TÚRKSOI uıymy túrki halyqtarynan shyqqan mıras tulǵalar mereıtoıyna turaqty atsalysyp keledi. Barsha túrki halyqtarynyń rýhanı qundylyqtary – ortaq mádenı muramyz» dep atap ótken Sultan Raev ári qaraıǵy sózin Sáken Seıfýllınniń «Jambyl jyrlary teńiz túbinde shashylyp jatqan marjan sekildi. Ony jınap alyp, halqynyń qolyna berý – árqaısymyzdyń azamattyq boryshymyz» degen lepesimen aıaqtady.
Keıingi jyldary jas ǵalymdar tarapynan aqyn murasyn zertteýge degen qyzyǵýshylyq artyp keledi. Jambyl mýzeıiniń jetekshisi, aqynnyń nemeresi Saltanat Jambylova baba murasyn jınaqtaý, zertteý isiniń jandanyp, tyń jádigerlermen tolyǵyp otyrǵanyn atap ótti. Qazirgi kezde mýzeıdegi jádigerler sany 3 myńnan asqan. Mýzeıge jetken jádigerler arasynda 1954 jyly Qytaıda tóte jazýmen basylǵan shyǵarmalar jınaǵy erekshe nazar aýdartady. Osyndaı qundy eńbekterdi saqtap, nasıhattaý isi úzdiksiz jalǵasa beretin bolady.
Saltanatty is-shara barysynda elimizdiń mádenıetine úles qosqan óner maıtalmandary Prezıdenttiń Qurmet gramotasy jáne Alǵyshatymen marapattaldy. Olar Jambyl shyǵarmalarynan án men kúı oryndap, kórermen qoshemetine bólendi.
ALMATY
