Joba «Ǵylym qory» AQ-men birlesip, «Qazaqstan halqyna» qoǵamdyq qorynyń qoldaýymen iske asyrylyp jatyr. Baǵdarlama el ekonomıkasynyń basym salalaryna qoldanbaly JI sheshimder ázirleýge qabiletti, jasandy ıntellekt jáne kásipkerlik baǵytynda bilimi bar mamandardyń jańa býynyn qalyptas-tyrýǵa baǵyttalǵan.
Mınıstrlik taratqan aqparatqa súıensek, tirkelý jáne onlaın-testileý osy jylǵy 2 naýryz ben 15 naýryz aralyǵynda (saǵat 23:59-ǵa deıin) ótedi. Tirkelýden ótý jáne testileý joldary: 1. «PlatonusApp» mobıldi qosymshasy arqyly (Platonus platformasyn qoldanatyn JJOBBU bilim alýshylary úshin); 2. Eger sizdiń ýnıversıtetińiz «Platonus» platformasynda jumys istemese https://aisanatesting.kz siltemesi nemese https://aisana.gov.kz resmı saıty arqyly kire alasyz. Oqýdyń bastalýy 2026 jylǵy 25 naýryzǵa, al ekinshi kezeńniń aıaqtalýy 2026 jylǵy 10 maýsymǵa josparlanǵan.
Konkýrstyq irikteýge: Qazaqstan Respýblıkasynyń joǵary jáne (nemese) joǵary oqý ornynan keıingi bilim uıymdarynyń qazirgi stýdentteri, magıstranttary jáne doktoranttary; 2026 jyly «Bolashaq» halyqaralyq stıpendııalyq baǵdarlamasy boıynsha bilim alýshylar; «AI-Sana» baǵdarlamasynyń birinshi kezeńi nemese basqa da bilim baǵdarlamalary aıasynda jasandy ıntellekt boıynsha bazalyq kýrstardan ótken qatysýshylar; Aǵylshyn tilinen bazalyq deńgeıi bar úmitkerler (sertıfıkat talap etilmeıdi). Bazalyq aǵylshyn tili deńgeıi baǵdarlama boıynsha odan ári bilim alý JI modelder, kod (Python) jáne beıindi materıaldarmen jumys isteý úshin qajet.
Ekinshi kezeńde JI bazalyq meńgerýden tehnologııalardy praktıkalyq qoldanýǵa, jeke jobalardy ázirleýge ótýdi úırenedi. Jobany iske asyrýǵa «Stanford» jáne «MIT» ýnıversıtetteriniń ókilderi, Kremnıı alqabynyń venchýrlik qorlaryn jáne halyqaralyq bıznes-mektepterdi qosa alǵanda jetekshi halyqaralyq sarapshylar toby qatysady. Ekinshi kezeń materıaldaryn daıyndaý halyqaralyq sarapshy, Prezıdent janyndaǵy Jasandy ıntellektini damytý jónindegi keńes múshesi Pol Kımniń jetekshiligimen «Zemex Inc» (AQSh) kompanııasynyń qatysýymen júzege asyrylady. Tarqatyp aıtsaq, baǵdarlama qorytyndysy boıynsha qatysýshylar: mashınalyq oqytý modelderin ázirlep, úırete alady; «Python», «Google Colab», «Jupyter» quraldarymen jumys isteıdi; úlken tildik modelder men API-lerdi qoldanady; «MVP» (ónimniń alǵashqy qarapaıym nusqasyn) jasap, startap-ıdeıalardy tekseredi; ınvestısııalyq jáne salalyq trendterdi taldaıdy; dızaın-oılaý ádisin qoldanady; JI etıkalyq aspektilerin eskeredi; tehnologııalyq startap tujyrymdamasyn qalyptastyrady.
«AI-Sana» baǵdarlamasy elimizdiń ǵylymı-tehnologııalyq jáne ınnovasııalyq damýynyń ulttyq basymdyqtary sheńberinde iske asyrylady jáne eldegi eń iri JI qozǵalysyn qalyptastyrýǵa baǵyttalǵan.
Baǵdarlama boıynsha oqytýdyń birinshi kezeńinde negizgi AI daǵdylary, «Huawei», «Coursera», «Astana Hub» platformalarynda AI kirispe kýrstarynan 650 myń adam ótkenin mınıstrlik habarlaǵan bolatyn. Ekinshi kezeńde 100 myń adamdy oqytý josparlanǵan. Úshinshi kezeńde 60 myń qatysýshyǵa qurylymdaý, bızneske baǵdarlaný, salalyq sheshimderdi ázirleý, JI jobalaryn basqarý daǵdylary oqytylmaq. Al sońǵy tórtinshi kezeńde 1,5 myń startap shyǵarý mejelengen.
