Bıýdjet týraly zań jobasy tanystyryldy

Keshe Parlament Senatynda palata Tóraǵasy­nyń orynbasary Qaırat Ishanovtyń qatysýymen «2015-2017 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasy tanystyryldy, dep habarlady Senattyń baspasóz qyzmeti. 2014 jyldyń is júzindegi qorytyndylaryna súıene otyryp, esepteýlerdi naqtylaý, makroekonomıkalyq kórsetkishterdiń boljamyn túzetý, sondaı-aq, álemdik naryqtardaǵy eleýli aýytqýlar jáne jalpy alǵanda, qalyptasyp otyrǵan geosaıası faktorlar jaǵdaılarynda, eldiń áleýmettik-ekonomıkalyq jáne qarjylyq turaqtylyǵyn qamtamasyz etý sharalaryn qabyldaý qajettiligi 2015 jylǵa arnalǵan respýblıkalyq bıýdjetti naqtylaý úshin negiz bolyp tabylady. Naqtylanǵan bıýdjet jobasy Elbasynyń ústimizdegi jyldyń 11 aqpanynda Úkimettiń keńeıtilgen otyrysynda bergen tapsyrmalaryna sáıkes «Nurly Jol» memlekettik baǵdarlamasyna jasalǵan ózgeristerdi qamtıdy. Zań jobasy eki negizgi mindetti sheshýdi: - kiristerdiń túsý boljamynyń azaıýy nátıjesinde ózgergen bıýdjettiń teńgerimdiligin qamtamasyz etýdi; - jáne qolaıly jyldary Ulttyq qorda jınaqtalǵan rezervterdiń esebinen «Nurly Jol» baǵdarlamasyn iske asyrý arqyly ekonomıkany qoldaýdy qamtamasyz etýdi kózdeıdi. Ulttyq ekonomıka mınıstri E.Dosaev makroekonomı­kalyq turaqtylyqty 2015 jyly qamtamasyz etý sharalary týraly baıandady. Makroekonomıkalyq kórsetkishterdiń naqtylanǵan boljamy ekonomıka salalarynyń 2014 jylǵy aldyn ala damýy men qazirgi jaǵdaıdaǵy álemdik taýar naryqtaryndaǵy negizgi eksporttyq taýarlardyń baǵalary eskere otyryp jasaqtaldy. IJО́-niń ósýi 2015 jyly 1,5 paıyz, qarashadaǵy naqtylaýdan 3,3 paıyzdyq tarmaqqa tómen, 2016 jyly 2,2 (3,1 paıyzdyq tarmaqqa tómen) deńgeıinde baǵalanyp otyr. Buǵan qaraǵanda, IJО́ qarashadaǵy naqtylanǵan kórsetkishke qaraǵanda 2413,7 mıllıard teńgege tómen bolyp, 2015 jyly 41 307,6 mıllıard deńgeıinde boljanyp otyr, ol 2019 jylǵa 59 869,9 mıllıard teńgege ulǵaıady. IJО́ jan basyna shaqqanda 2015 jyly 12,8 myń dollardan 2019 jyly 17,6 myń dollarǵa ulǵaıady. «2015-2017 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyn qarjy mınıstri Baqyt Sultanov tanystyrdy. 2015 jylǵa arnalǵan respýblıkalyq bıýdjet túsimderi 5 988 mlrd. teńge kóleminde nemese bekitilgen bıýdjetpen (6 858 mlrd. teńge) salystyrǵanda 870 mlrd. teńgege belgilendi. Kiristerdiń boljamy (transfertterdiń túsimin esepke alýsyz) 3 219,9 mlrd. teńge kóleminde nemese buryn bekitilgen kólemnen 939,6 mlrd. teńgege tómen, onyń ishinde salyqtyq túsimder boıynsha 959,6 mlrd. teńgege tómendeý esebinen baǵalanady. Ulttyq qordan kepildik berilgen transfert mólsheri 1 702 mlrd. teńge bekitilgen deńgeıinde saqtalady. Ulttyq qordan nysanaly transfert «Nurly jol» baǵdarlamasyn túzetýge baılanysty 76,0 mlrd. teńgege ulǵaıtyldy jáne 783,5 mlrd. teńgeni quraıdy. Respýblıkalyq bıýdjet shyǵystary – shyǵystardy 686,7 mlrd. teńgege ońtaılandyrýdyń jáne «Nurly Jol» baǵdarlamasynyń jańa baǵyttaryna 76,0 mlrd. teńgege ulǵaıtýdyń nátıjesinde, bekitilgen bıýdjetpen salystyrǵanda 610,7 mlrd. teńgege tómendeı otyryp, 7 244,5 mlrd. teńge somasynda qalyptasty. Ulttyq bank tóraǵasynyń orynbasary Oleg Smolıakov depýtattardy aqsha-nesıe saıasatyndaǵy ózekti máseleler týraly depýtattardy habardar etti.