Búginde Sarqan qalasynda turǵyn úı qurylysy qarqyndy júrgizilip jatyr. Munda 60 páterli 30 turǵyn úı el ıgiligine beriledi. Bul – tek qurylys nysany emes, ondaǵan otbasynyń bolashaqqa degen úmitin úkileıtin úlken joba, shalǵaıdaǵy eldi mekenderdiń áleýmettik jaǵdaıyn jaqsartýǵa baǵyttalǵan mańyzdy qadam.
Bastamany batyl qolǵa alǵan Orazǵalı Sádýaqasov týǵan jerine degen súıispenshiligin naqty ispen dáleldep keledi. Jobany júzege asyrý jumystaryn onyń uly Arnur Orazǵalıuly jetekshilik etetin «Sangaz» jaýapkershiligi shekteýli seriktestigi atqaryp jatyr. Áke men balanyń bir maqsat jolyndaǵy eńbegi óńir turǵyndarynyń rızashylyǵyna bólenip otyr.
«Qazaq halqy ejelden týǵan jerdiń qadirin bıik qoıǵan. «Týǵan jerge týyńdy tik» degen dana sózdiń máni de osynda. Qaı kezde de eliniń damýyna úles qosqan azamattar halyqtyń qurmetine ıe bolǵan. Búgingi ıgi bastama da sol dástúrdiń jalǵasy», deıdi Arnur Orazǵalıuly.
Qurylys jumystary belgilengen josparǵa saı júrgizilip jatyr. Nysandardyń barlyǵy zamanaýı talaptarǵa sáıkes salynyp, turǵyndardyń jaıly ómir súrýine qajetti jaǵdaılar qarastyrylǵan. Qazirde qurylys alańynda 30-dan astam adam turaqty eńbek etip jatsa, jergilikti turǵyndardyń da jumyspen qamtylýyna múmkindik jasalǵan.
«Úı salynyp jatqan jer telimin satyp aldyq. Qurylysqa qoldanylatyn materıaldardyń barlyǵy elimizde óndirilgen ónimder. Ázirge bul aýmaqta gaz júıesi tartylmaǵandyqtan, turǵyn úıler qatty otynmen jylytylady. Sý, jaryq, káriz júıelerin de óz qarajatymyzǵa júrgizip jatyrmyz. Gazbloktan turǵyzylǵan úılerdiń syrtqy árleý jumystary tolyq aıaqtalyp, esik-terezesi ornatylyp, edenine lamınat tóselip, qabyrǵalary kafelmen qaptalyp, tolyq daıyn kúıinde tapsyrylady», deıdi kásipker.
Saıyp kelgende, bul bastamanyń áleýmettik mańyzy óte zor. О́ıtkeni turǵyn úı máselesi qaı kezde de barynsha ózekti. Jańa úılerdiń paıdalanýǵa berilýi baspanaǵa muqtaj azamattardyń jaǵdaıyn jaqsartyp qana qoımaı, qala kelbetine de oń ózgeris ákeledi.
Eń bastysy, jobanyń astarynda týǵan jerge degen shynaıy janashyrlyq jatyr. Ádette kásipkerler ınvestısııany iri qalalar men tabysy joǵary jobalarǵa baǵyttaýǵa umtylady. Al Sarqandaı shaǵyn qalada osyndaı aýqymdy qurylys júrgizý – týǵan óńirdiń bolashaǵyna degen senim men jaýapkershiliktiń aıqyn kórinisi.
«Qaıyrymdylyq qarjylaı kómek kórsetýmen ǵana ólshenbeıdi. Keıde halyqqa qajetti nysan salý, jumys oryndaryn ashý, áleýmettik máselelerdiń sheshilýine yqpal etý de úlken saýapty is sanalady. Osy turǵydan alǵanda Orazǵalı Sádýaqasovtyń bastamasy – kópshilikke úlgi bolatyn azamattyq ustanym», deıdi Sarqan aýdanynyń turǵyny Edilbek Jantileý.
Jergilikti turǵyndar ıgi iske rızashylyqtaryn bildirip otyr. О́ıtkeni jańa turǵyn úılerdiń salynýy óńirdiń áleýmettik-ekonomıkalyq damýyna tyń serpin berip, halyqtyń ál-aýqatyn arttyrýǵa múmkindik jasaıdy. Mundaı jobalar eldi mekenderdiń damýyna ǵana emes, jastardyń týǵan jerde turaqtap eńbek etýine de yqpal etedi. Qurylys jumysy tolyq aıaqtalǵan soń, ondaǵan otbasy jańa qonysqa kóship, kópten kútken qýanyshqa keneledi. Bul – bir jaǵynan baspana máselesiniń sheshimi bolsa, ekinshi jaǵynan týǵan jerdiń gúldenýine qosylǵan úles.
«Jaqsynyń jaqsylyǵyn aıt, nury tasysyn» degen sóz bar. Sarqanda júzege asyp jatqan ıgilikti is – týǵan jerge degen súıispenshiliktiń, áleýmettik jaýapkershiliktiń, qaıyrymdylyqtyń jarqyn úlgisi. Osyndaı bastamalar kóbeıgen saıyn óńirler damyp, eldiń eńsesi bıikteı túseri anyq.
Jetisý oblysy
