Maıtalmandar marapattaldy

Teatr – halyqty adamgershilik pen izgilikke tárbıeleýdiń asa mańyzdy quraly. Osynaý ulyq ónerdiń tarıhı jaǵynan qalyptasyp, damý, ósip-órkendeý joly árbir ulttyń, ár halyqtyń ómir- turmysymen, mádenıetimen tyǵyz baılanysty. Sondyqtan, bul mereıli datany, ıaǵnı Teatr kúnin óz deńgeıinde atap ótý bas qalanyń mádenı ómirinde de dástúrge aınalǵan.  Taıaýda Halyqaralyq teatr kúnine oraı elordadaǵy Jastar teatrynda merekelik shara ótti. Keshke Jastar teatry, Q.Qýanyshbaev atyndaǵy Qazaq akademııalyq mýzykalyq-drama teatry, M.Gorkıı atyndaǵy orys akademııalyq teatry, Astana qalasy Kóńildi tapqyrlar men Qýyrshaq jáne «Naz» memlekettik bı teatrlary qatysyp, kópshilik qaýymǵa kóterińki kóńil-kúı syılady. Bul kúni Astana qalasynyń teatrlary sahna men sahna syrtyndaǵy qyzyqty sátter, ádemi áýezdi áýen, mınıatıýralar kórsetip, bir serpiltip tastady. Baǵdarlama barysynda Astana qalasy ákiminiń orynbasary Ermek Amanshaev elordalyq teatr ujymdaryn tól merekelerimen quttyqtap, olarǵa shyǵarmashylyq tabys pen shabyt tiledi. Sondaı-aq, úzdik akterlerge, teatr salasynyń maıtalman mamandary men jeti teatrdyń ártisteri elorda ákimi Ádilbek Jaqsybekovtiń atynan arnaıy Alǵys hattarmen marapattalyp, syılyqtar tabys etildi. Kesh sońynda Astana qalalyq memlekettik fılar­monııa­synyń shyǵarmashylyq ujymy konsert berdi. Sondaı-aq, teatr foıesinde teatrlar kórmesi ótti. Raýshan TÁÝIRHANQYZY, «Egemen Qazaqstan».