Ultymyzdyń ǵulama ǵalymdary men qoǵam jáne memleket qaıratkerleriniń mereıtoılyq jyldaryna oraı, «Qazposhta» AQ «Estelik jáne mereıtoılyq kúnder» taqyrybymen serııaly poshtalyq markalardy aınalymǵa engizýde.
Solardyń qatarynda – Álıhan Bókeıhan men Ybyraı Altynsarın jáne Qaıym Muhamedhanov syndy ult zııalylarynyń qurmetine arnalǵan poshta markalarynyń árqaısysy 2,5 mln. dana taralymmen shyǵarylady dep josparlanǵan. Ǵalymdar men oıshyldarǵa arnalǵan poshtalyq markalardy aınalymǵa shyǵarý sharasy Álıhan Bókeıhannyń 150 jyldyǵy mereıtoıynyń qurmetine arnalǵan poshta markasyn tanystyrý rásimimen bastaldy.
«Aq jol» demokratııalyq partııasynyń Ortalyq keńsesinde ótken jıynǵa elimizge belgili alashtanýshylar men osy jolda janyn pıda etken qaıratkerler ómirin zerttep júrgen azamattar jáne qoǵam belsendileri qatysty. Otyrysqa jetekshilik etken «Aq jol» demokratııalyq partııasynyń tóraǵasy, Májilis depýtaty Azat Perýashev partııanyń Parlamenttik fraksııasynyń atynan ótken jyldyń jeltoqsan aıynda «Qazposhta» AQ-tyń basshylyǵyna arnaıy joldanǵan saýalda halyqaralyq deńgeıde moıyndalǵan, sańlaq saıasatker, memleket jáne qoǵam qaıratkeri, ǵulama ǵalym, kósemsózdiń sheberi Álıhan Bókeıhannyń 150 jyldyq mereıtoıy qurmetine arnaıy poshta markasyn shyǵarý qajettigi aıtylǵandyǵyn eske túsirdi.
«Osyndaı hattyń negizinde aıtylǵan oı-pikirimiz, minekı, búgin oryndalyp, «Qazposhta» AQ jetekshileriniń sheshimimen nomınaly 5 teńgelik poshtalyq markalar aınalymǵa engizilýde. Bul táýelsiz elimizdiń baıandy bolashaǵy úshin basyn báıgege tikken arys azamattarymyzdy ulyqtaý men olardy nasıhattaýdyń utymdy ádisteriniń biri», – dedi Azat Turlybekuly. «Ulttyq Bank Banknot fabrıkasy» respýblıkalyq memlekettik kásipornynda basylyp shyqqan markaǵa qoǵam qaıratkeriniń naq 110 jyl buryn Peterbýrgte túsken sýreti salynǵan. «Bul Á.Bókeıhannyń 1906 jyly 8 shilde kúni Peterbýrgke barǵan kezinde Birinshi Memlekettik Dýmanyń depýtaty retinde túsken sýreti. Alaıda, ol jerde sýret astyna onyń aty-jóni «Hanov» dep qate jazylǵan. Qazirgi kezge deıin bul foto bizge Býlla fotoatelesiniń ónimi retinde belgili.
Al Álıhannyń álemge áıgilengen eń tanymal beınesi osy bolǵandyqtan, biz aqyldasa kele osy sýretti poshtalyq markada qaıta jańǵyrtýdy jón kórdik», – dedi «Alash» ǵylymı-zertteý ınstıtýtynyń dırektory Sultan Han Aqquly. Aıta keteıik, saltanatty shara aıasynda ofsettik basylymda 2 tústi boıaýmen salynǵan Álıhan Bókeıhannyń sýreti beınelengen kólemi 26h18 mm. marka japsyrylǵan konvertterge arnaıy poshta mórqalyby da basyldy.
Sondaı-aq, «Aq jol» partııasy ókilderiniń usynysymen júzege asqan jobanyń tusaýkeser rásimine qatysqan alashtanýshy ǵalym Erbol Tileshov pen Saǵymbaı Jumaǵulov, sondaı-aq, Kenjebolat Joldybaı, Qaıyrbek Sádýaqasov, Álıhan Bókeıhannyń týysy Asylhan Tileýqabyl, «Qazposhta» AQ basqarmasy tóraǵasynyń orynbasary Sáýle Egemberdıeva, «Aq jol» QDP Ortalyq keńesiniń ıdeologııalyq jumys jónindegi hatshysy Sábıt Baıdaly syndy azamattar sóz sóılep, Álıhan Bókeıhannyń 150 jyldyǵy men kelesi jylǵy Alash avtonomııasynyń qurylǵanyna 100 jyl tolatynyna oraı usynys-pikirlerdi ortaǵa salyp talqylady.
Nurlybek DOSYBAI, «Egemen Qazaqstan»