Qostanaı zııalylary kópten aıtyp júrgen kókeıdegi bir is oryndaldy. Kemeńger aǵartýshy Ybyraı Altynsarınniń ózi ashqan mekteptiń ornyna eskertkish belgitas qoıyldy. Oǵan «Osy jerde 1884 jyly uly aǵartýshy, ustaz Y.Altynsarın alǵashqy qazaq mektebin ashty» dep jazylǵan jáne sol mekteptiń sýreti berilgen. Ybyraı ashqan mektepti ótken ǵasyrdyń 70-shi jyldary súrip tastap, ornyna jańa bilim uıasy salynǵan edi. Bıyl Ybyraı Altynsarınniń týǵanyna 175 jyl tolady. Ol kúzde oblysta hal-qaderinshe atalyp ótpek. Oblys jurtshylyǵy ókilderi osy shara aıasynda ustazdyń ózi ashqan, qazaqtyń irileri bilim alǵan mekteptiń ornyna belgi qoıýdy oblys ákimi Arhımed Muhambetovke ótinish etip aıtqan bolatyn. Sol mektepten bilim alǵan ardager aǵalardyń lebizin ákim qoldaǵan bolatyn.
– Eskertkish belgitasty qostanaılyq músinshi Egor Kıslısın Jitiqaradan ákelingen tabıǵı qyzyl granıt tastan oıyp jasady. Al jazý tabıǵı bazalt plıtaǵa jazyldy. Eskertkish belginiń salmaǵy 10 tonnadan asady – dedi ardager ustaz.
Uly aǵartýshynyń týǵanyna 175 jyl tolý mereıtoıy aıasynda qala syrtyndaǵy Ybyraı kesenesiniń tozyp ketken tustary jóndelip, aınalasy qalypqa keltiriletin bolady.
Názıra JÁRIMBETOVA,
«Egemen Qazaqstan»
QOSTANAI