Qurban aıt merekesi kúni Qostanaıda jańa meshit jamaǵatqa esigin aıqara ashty. Bul Qostanaı oblysyndaǵy eń záýlim meshit jáne sonymen qatar oblys ortalyǵynyń sánin keltiretin sáýletti arhıtektýralyq ǵımarattardyń birine aınaldy. Oǵan bir mezgilde 2200 adam kirip ǵıbadat jasaı alady. Oblys ákimi Arhımed Muhambetov meshittiń ashylý saltanatyndaǵy quttyqtaý sózinde sońǵy jyldary qazaq halqy úshin ata-babamyz ustanǵan ıslamnyń hanafı mazhab baǵytynyń haq jolyna bet burýshylardyń kóbeıip kele jatqandyǵyn atap ótti jáne meshittiń jastarǵa rýhanı tárbıe beretin jáne dástúrli dinimizdi nasıhattaıtyn ortalyqqa aınalatynyna senim bildirdi. Musylmandardyń dinı basqarmasynyń sheshimimen meshitke belgili ýaǵyzdaýshy bolǵan jáne Qostanaı jáne Torǵaı óńirinde ıslam qundylyqtarynyń taratylýyna úlken úles qosqan Aımaǵanbet kajy Spanulynyń esimi berildi. Meshittiń ashylýyna Qazaqstan musylmandary dinı basqarmasynyń ókili Kamaljan Turdybaev arnaıy kelip qatysyp, jamaǵatty qýanyshpen qutyqtady.
Meshittiń 2010 jyly bastalǵan qurylysy qarjynyń joqtyǵynan biraz ýaqyt turyp qalǵan bolatyn. Ústimizdegi jyldyń basynda ol qaıta qolǵa alynyp, mamyr aıynan qyrkúıek aıyna deıin qyzý júrgen qurylys jumystarynyń arqasynda daıyn boldy. Meshit qurylysy demeýshiler bergen qarjyǵa salyndy.
Meshit ǵımaraty úsh qabattan turady, birinshi qabatynda 1450 adamǵa arnalǵan erlerdiń ǵıbadat jáne neke qııý zaldary bar. Ekinshi qabatynda áıelderdiń ǵıbadat jasaıtyn zaly ornalasqan. Kúmbezdik qabatynda qosalqy oryn-jaılar bar.
Jańa meshittiń kestelengen mıhraby jáne alystan jarqyraıtyn altyn tústes bas kúmbezi, oıýlanǵan esikteri, jumsaq kilemderi onyń sán-sáýletin aıshyqtaı túsedi. Ǵımarattyń jalpy alańy shamamen 4 myń sharshy metrdeı. Munarasynyń bıiktigi – 40 metrdi, bas kúmbeziniń bıiktigi – 25 metrdi jáne onyń dıametri 12 metrdi quraıdy.
Názıra Járimbetova,
QOSTANAI