Memleket basshysy Nursultan Nazarbaev «Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly» Jarlyqqa qol qoıdy, dep habarlaıdy Aqordanyń baspasóz qyzmeti.
Qazaqstan Respýblıkasy Konstıtýsııasynyń 44-babynyń 3) tarmaqshasyna sáıkes memlekettik basqarý júıesin jańǵyrtý jáne onyń tıimdiligin arttyrý maqsatynda qaýly etemin:
Qazaqstan Respýblıkasynyń Din isteri jáne azamattyq qoǵam mınıstrligi, oǵan:
Qazaqstan Respýblıkasynyń Mádenıet jáne sport mınıstrliginen - dinı birlestiktermen ózara is-qımyl, dinı senim bostandyǵyna azamattardyń quqyqtaryn qamtamasyz etý, sondaı-aq memleket pen azamattyq sektordyń ózara is-qımyly salalaryndaǵy;
Qazaqstan Respýblıkasynyń Bilim jáne ǵylym mınıstrliginen - jastar saıasaty salasyndaǵy fýnksııalary men ókilettikteri berile otyryp, qurylsyn.
Qazaqstan Respýblıkasynyń Úkimeti:
1) Qazaqstan Respýblıkasynyń Prezıdenti Ákimshiligimen kelisý boıynsha qaıta uıymdastyrylatyn jáne qurylǵan memlekettik organdardyń shtat sanyn qaıta bólýdi;
2) osy Jarlyqtan týyndaıtyn ózge de sharalar qabyldaýdy qamtamasyz etsin.
«Qazaqstan Respýblıkasy Úkimetiniń qurylymy týraly» Qazaqstan Respýblıkasy Prezıdentiniń 1999 jylǵy 22 qańtardaǵy № 6 Jarlyǵyna mynadaı tolyqtyrý engizilsin:
1-tarmaqta:
«Qazaqstan Respýblıkasynyń Bilim jáne ǵylym mınıstrligi;» degen joldan keıin mynadaı mazmundaǵy jolmen tolyqtyrylsyn:
«Qazaqstan Respýblıkasynyń Din isteri jáne azamattyq qoǵam mınıstrligi;».
Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.
Osy Jarlyq qol qoıylǵan kúninen bastap qoldanysqa engiziledi.
Qazaqstan Respýblıkasynyń Prezıdenti N.Nazarbaev
Astana, Aqorda, 2016 jylǵy 13 qyrkúıek, №329
Memleket basshysy Jarlyǵymen Din isteri jáne azamattyq qoǵam mınıstri bolyp Nurlan Baıuzaquly Ermekbaev taǵaıyndaldy. Osy Jarlyqpen ol Qazaqstan Respýblıkasy Prezıdentiniń kómekshisi - Qaýipsizdik Keńesiniń hatshysy qyzmetinen bosatyldy.