Qazir fýtboldan Qazaqstan premer-lıgasynyń naǵyz qyzǵan shaǵy. Ásirese, chempıondyqtan basty úmitkerler – «Astana» men «Qaırattyń» arasyndaǵy teketires jankúıerlerdiń delebesin odan ári qozdyryp tur. Sondaı-aq, kópshilik birinshi aınalymnan keıin-aq premer-lıgadan «shyǵaryp tastaǵan» Oraldyń «Aqjaıyǵy» da týr saıyn túlep, jarystyń kórigin qyzdyrýda. О́tken demalys kúnderi oınalǵan
26-týr oıyndary osyndaı tartysty sátterge toly boldy.
Týrdyń ortalyq kezdesýi elordada jergilikti «Astana» men «Qaırat» komandalary arasynda ótti. Otandyq jankúıerler erekshe nazar aýdarǵan bul oıynda Stanımır Stoılovtyń komandasynyń baby kelispedi. Al alǵashy mınýttardan bastap tizgindi qolǵa alǵan almatylyqtar 5-mınýtta-aq Asevedonyń kómegimen esep ashyp úlgerdi.
Ekinshi taımda da qarqynynan taımaǵan almatylyqtar aınaldyrǵan alty mınýttyń ishinde eki gol soǵyp ketti. Aldymen, 62-mınýtta komanda kapıtany Baýyrjan Islamhan mergendigimen kózge tússe, 68-mınýtta chempıonattyń surmergeni Jerar Goý qanjyǵasyn maılady. О́z jankúıerleri aldynda namysqa tyrysqan «Astana» oıynshylary 71-mınýtta Djordje Despotovıchtiń golymen esep aıyrmasyn qysqartqan bolatyn. Arada 5 mınýt ótkende, «Qaırat» sapyndaǵy reseılik legıoner Andreı Arshavın nátıjeli soqqy jasap, oıynnyń núktesin qoıdy.
Osylaısha, 4:1 esebimen jeńiske jetken «Qaırat» «Astanamen» aradaǵy upaı aıyrmashylyǵyn 4-ke deıin qysqartyp, chempıondyqtan áli de úmitti ekenin ańǵartty.
Eýrokýboktyk básekelerde baq synaýǵa múmkindik beretin úshinshi orynnan úmitti Pavlodardyń «Ertisi» bul týrda óz alańynda Shymkenttiń «Ordabasyn» qabyldap, 1:2 esebimen ese jiberdi. Al Kókshetaýda jergilikti «Oqjetpes» «Aqtóbeden» oısyraı jeńildi (0:3).
Premer-lıgadaǵy oryndaryn saqtap qalý úshin «jan berip, jan alysyp» jatqan ekinshi altylyqtyń komandalary da aıtarlyqtaı tartysty kezdesýler ótkizýde. Ásirese, kósh sońynda kele jatqan Oraldyń «Aqjaıyǵy» tórtinshi týr qatarynan jeńiske jetip, myqtylar sapynda qalý múmkindigin saqtap qaldy. Bul joly «Aqjaıyq» óz alańynda Qostanaıdyń «Tobylynan» basym tústi (1:0).