Qurban aıt merekesi kúni Qostanaıda jańa meshit jamaǵatqa esigin ashty. Bul Qostanaı oblysyndaǵy eń záýlim meshit jáne oblys ortalyǵynyń sánin keltiretin sáýletti arhıtektýralyq ǵımarattardyń birine aınaldy. Oǵan bir mezgilde 2200 adam kirip ǵıbadat jasaı alady. Oblys ákimi Arhımed Muhambetov meshittiń ashylý saltanatyndaǵy quttyqtaý sózinde sońǵy jyldary qazaq halqy úshin ata-babamyz ustanǵan ıslamnyń Hanafı mazhab baǵytynyń haq jolyna bet burýshylardyń kóbeıip kele jatqandyǵyn atap ótti jáne meshittiń jastarǵa rýhanı tárbıe beretin jáne dástúrli dinimizdi nasıhattaıtyn ortalyqqa aınalatynyna senim bildirdi.
– Qazirgi ýaqytta meshitter tek dinı mekeme emes, rýhanı ortalyqqa, tárbıe oshaǵyna aınalyp keledi. Halqymyzdyń rýhanı qundylyqtaryn jańǵyrtý jáne saqtaý bizdiń elimiz táýelsizdiginiń qol jetkizgen birden-bir jetistigi bolyp tabylady. Salt-dástúri men ádet-ǵurpyndaǵy, dinı senimindegi aıyrmashylyqtarǵa qaramastan elimizdegi túrli ult men ulystar bir ortaq maqsat pen Qazaqstannyń serpindi damýyna, týǵan jerimizde beıbitshilik pen yrys-berekeniń saqtalýyna umtylyp, yntymaqpen ómir súrip otyr», – dedi óńir basshysy.
Qazaqstan musylmandar dinı basqarmasynyń sheshimimen meshitke belgili din ýaǵyzdaýshy jáne Qostanaı, Torǵaı óńirinde ıslam qundylyqtarynyń taralýyna úlken úles qosqan Aımaǵanbet kajy Spanulynyń esimi berildi. Meshittiń ashylýyna Qazaqstan musylmandary dinı basqarmasynyń ókili Kamaljan Turdybaev arnaıy kelip qatysyp, jamaǵatty qýanyshpen quttyqtady.
Meshittiń 2010 jyly bastalǵan qurylysy qarjynyń joqtyǵynan biraz ýaqyt turyp qalǵan bolatyn. Ústimizdegi jyldyń basynda ol qaıta qolǵa alynyp, mamyr aıynan qyrkúıek aıyna deıin qyzý júrgen qurylys jumystarynyń arqasynda daıyn boldy. Meshit qurylysy demeýshiler bergen qarjyǵa salyndy. Meshit qurylysyn qarjylandyrýǵa ataqty ken alyby Sokolov-Sarybaı ken óndirisi birlestigi, «Tobyl» áleýmettik kásipkerlik korporasııasy, «Qarqyn», «Sholaqsaı», «Qarasý», «Moskalev» sharýashylyqtary, taǵy basqa kóptegen bıznes ókilderi, qarapaıym turǵyndar atsalysty.
Meshit ǵımaraty úsh qabattan turady, birinshi qabatynda 1450 adamǵa arnalǵan erlerdiń ǵıbadat zaly ornalasqan. Osy qabatta neke qııý zaly, ekinshi qabatynda áıelderdiń ǵıbadat jasaıtyn zaly, al kúmbezdik qabatynda qosalqy oryn-jaılar bar.
Jańa meshittiń kestelengen mıhraby jáne alystan jarqyraıtyn altyn tústes bas kúmbezi, oıýlanǵan esikteri, jumsaq kilemderi onyń sán-sáýletin aıshyqtaı túsedi. Ǵımarattyń jalpy alańy shamamen 4 myń sharshy metrdeı. Munarasynyń bıiktigi – 40 metrdi, bas kúmbeziniń bıiktigi – 25 metrdi jáne onyń dıametri 12 metrdi quraıdy.
Názıra JÁRIMBETOVA,
«Egemen Qazaqstan»
QOSTANAI