О́tken senbide elordaǵa «Qýatty óńir – qýatty Qazaqstan» aksııasy aıasynda Almaty oblysynyń delegasııasy kelgen edi. Bul kúnderi oblystyq taýar óndirýshilerdiń aýylsharýashylyq jármeńkesi, kitap pen sándik-qoldanbaly óner kórmeleri, óńir ártisteriniń qatysýymen merekelik konsertter men túrli spektaklder qoıyldy. Sonymen qosa Almaty oblysynyń ókilderi mádenı baǵdarlamalaryn usynyp, qala turǵyndary men qonaqtarynyń kóńilin bir serpiltip tastady. Sonyń biri Kongress-holl saraıynda shyǵarmashylyq ujymnyń qatysýymen ótken «Jetisý – jumaq mekenim» atty gala-konserti.
Atalǵan konserttik baǵdarlama sheńberinde «Arnaý», «Án shashý», «Kóksholaq», «Jan aǵa», «Kózińniń móldirin-aı», «Dúldúlim», «Sáýlem-aı», «Jetisý», «Taldy arýlary», «Elge tilek», «Halyq dostyǵy» (qazaq, orys, koreı, tatar, uıǵyr, cheshen, ýkraın, ózbek ulttarynyń) bıleri men ıtalıan ánderinen «popýrrı», «Birjan-Sara» operasynan úzindiler tamashalandy.
Dana halqymyz «Án – kóńildiń ajary», «Án ómir uzartady» dep te jatady. Bul joly tyńdarman qaýym árbir ándi qosyla shyrqap, Jetisý óńiriniń jaýhar jyrlaryna degen sary kóbelek saǵynyshtaryn erekshe tolqynyspen sezingendeı edi. Ony nur tógilgen júzderinen, shabyttanǵan kóńilderinen ańǵarýǵa bolatyn. Osyndaıda hakim Abaıdyń: «Qulaqtan kirip, boıdy alar, Ásem án men tátti kúı», degen óleń joldary eriksiz eske túsedi. Qysqasy, bul ıgi shara qala turǵyndaryn máre-sáre qýanyshqa bólep, erekshe demalys syılady.
«Egemen-aqparat»
Sýretterdi túsirgen
Orynbaı BALMURAT,
«Egemen Qazaqstan»