M.Qozybaev atyndaǵy Soltústik Qazaqstan memlekettik ýnıversıteti rektorynyń mindetin atqarýshy Serik О́mirbaev stýdent atanǵan «Altyn belgi» ıegerlerimen kezdesýde bilim jáne ǵylym salasyndaǵy ózgeristerge keńinen toqtaldy. Osy sala boıynsha túzilgen respýblıkalyq baǵdarlamada jeke tulǵanyń jan-jaqty qalyptasýyna, oqý pánderiniń mazmunyna erekshe basymdyq berilgen. Ekinshi semestrden bastap stýdentter bilim berý deńgeıin baǵalaý arqyly jáne mamandyq boıynsha pánder men oqytýshylardy ózderi tańdaý quqyna ıe bolady. Sol sııaqty Anglııa, Italııa, Ispanııa, Germanııa, taǵy basqa eldermen tyǵyz áriptestik baılanys ornatylyp, qos dıplomdy mamandyq alý dástúri odan ári jalǵasatyn bolady.
Stýdentter arasynda quqyqtaný, ekonomıka, matematıka, radıotehnıka, geografııa, shet tili mamandyqtaryna qyzyǵýshylyq basym. Bıyl 1700-den astam túlek stýdent partasyna otyrsa, 111 adam magıstratýraǵa, 6 adam doktorantýraǵa qabyldanǵan. Bólingen 366 memlekettik granttyń 233-in ońtústikten bilim qýyp kelgen jastar ıelengen.
Jergilikti mańyzy zor aıtýly oqıǵanyń biri – jýrnalıster daıarlaıtyn bólimniń kafedraǵa aınalýy. О́ńirde qazaq jýrnalısteriniń qanattanyp ushýyna ózindik úles qosqan ýnıversıtettiń professory, bilikti ǵalym Zarqyn Taıshybaıdyń aıtýynsha, aımaq úshin mamandar ázirleıtin qazaq jáne orys jýrnalıstıka bólimderi fılologııa kafedralarynyń qaramaǵynda bolyp kelse, endi derbestik sıpatqa ıe. 2001 jyldan beri onyń qabyrǵasynan 80 túlek dıplom alyp, 10 adam jýrnalıstıka magıstri atanǵan. Birinshi kýrsqa 23 talapker qabyldanǵan.
Byltyrdan beri syrttaı oqytý bólimi jumys isteıdi.
О́mir ESQALI,
«Egemen Qazaqstan»
Soltústik Qazaqstan oblysy