Elordada Májilis depýtattary Sot-saraptama ortalyǵynda bolyp, atalǵan ınstıtýt basshylyǵymen jáne sarapshylarmen kezdesý barysynda salanyń ózekti máseleleri sóz etildi. Jáne de Parlament qabyldaǵan jańa zańnamalyq aktilerdiń erejeleri túsindirilip, onyń oryndalý barysy talqyǵa tústi.
Májilistiń Zańnama jáne sot-quqyqtyq reforma komıtetiniń hatshysy Svetlana Bychkova qazirgi tańda Parlamentte qaralyp jatqan «Qazaqstan Respýblıkasyndaǵy sot-saraptama qyzmeti týraly» zań jobasynyń basymdyqtaryna keńinen toqtaldy. Eldegi sarapshylyq fýnksııalardy bir memlekettik organnyń ishinde ortalyqtandyrý normalary zańdyq qujattyń negizgi jańashyldyǵy ekendigi de erekshe ataldy. Zań jobasymen elimizde jekemenshik sot sarapshylary ınstıtýtyn damytýǵa jáne sot sarapshylary palatasyn qurýǵa erekshe den qoıylǵan. Bul rette, jańa zań jobasynyń erejeleri birqatar kodeks normalarymen sáıkestendirilgendigin aıta ketý kerek. Taǵy bir belgilisi, zań jobasynda sot-saraptama qyzmeti aıtarlyqtaı keńeıtilip, jańa uǵymdarmen tolyqtyrylyp otyr.
Al Ádilet mınıstrligi Sot-saraptama ortalyǵynyń dırektory Isıdor Borchashvılı, óz kezeginde, elimizdiń sot-saraptama mamandary shyǵarǵan sheshimderi álemniń 90-nan astam memleketinde moıyndalatyndyǵyn jetkizdi.
«Halyqaralyq deńgeıge shyǵý úshin akkredıtteýden ótýimiz kerek. Elimizde myqty mamandardyń barlyǵyn dáleldeýge tıispiz. Astanadaǵy Sot-saraptama ortalyǵy byltyr akkredıtteýden sátti ótip, bıyl keńeıýde. Jalpy, Qazaqstannyń sot-saraptama mamandarynyń shyǵarǵan sheshimderi dálel retinde álemniń 90-nan astam memleketinde moıyndalady», dedi I.Borchashvılı.
Bıylǵy jyldyń birinshi toqsanyna deıin Ortalyq sot-saraptama ınstıtýtynyń akkredıtteý aýqymy keńeıtiledi dep kútilýde, sondaı-aq, Aqmola, Almaty, Shyǵys Qazaqstan jáne Qaraǵandy oblystarynda ornalasqan zertxanalarǵa sapa standarttaryn engizý josparlanǵan.