Elimizde Alaý estafetasyna qatysatyn 16 qala Ýnıversıada alaýyn kóterý qurmetine laıyqty tulǵalardyń esimin anyqtady. Sany myń bolatyn alaý kóterýshilerdiń 70 paıyzyn ǵylym, mádenıet jáne sport salasynda jetistikterge jetken 17 men 28 jas aralyǵyndaǵy stýdentter qurap otyr.
Sonymen qatar, el sporty men qoǵamdyq ómirinde úlken eńbekter atqaryp júrgen belsendi azamattar da alaý kóterý qurmetine ıe boldy. Olardyń qatarynda grek-rım kúresinen 1980 jylǵy Olımpıada chempıony Jaqsylyq Úshkempirov, bokstan 2000 jylǵy Olımpıada chempıony Ermahan Ibraıymov, 1988 jylǵy Olımpıada oıyndarynyń kúmis júldegeri, Qazaqstan Respýblıkasynyń eńbek sińirgen bapkeri Dáýlet Turlyhanov, bokstan eki dúrkin álem chempıony Nazym Qyzaıbaı, júzýden 2016 jylǵy Olımpıada chempıony Dmıtrıı Balandın, Ábý Dabıde ótken djıý-djıtsýdan álem chempıony Móldir Mekenbaeva, sondaı-aq, túrli jyldary Qazaqstanǵa talaı jeńis syılaǵan basqa da kóptegen sportshylar bar.
Esterińizge salsaq, alaý kóterýshilerdi irikteý úsh kezeńnen turdy. Irikteýdiń birinshi kezeńi 1 qyrkúıek kúni bastalyp, respýblıkamyzdyń barlyq joǵary oqý oryndaryn qamtydy.
Ýnıversıtetter ishki baıqaý qorytyndysy boıynsha óz ótinimderin qalyptastyrdy. Ekinshi kezeńdegi irikteý barysyna oblystyq ortalyqtardaǵy Estafetany ótkizýmen aınalysatyn aımaqtyq shtabtar qosyldy. Shtabtardyń mindeti alaý kóterýshilerdi irikteý barysyn baqylap, baıqaý kezinde bedeldi ári tartymdy degen úmitkerlerdi ótkizip almaýǵa baǵyttaldy.
Ekinshi kezeńde aldyńǵy Ýnıversıadalardyń jeńimpazdarynan, sport, ǵylym jáne mádenıet salasyndaǵy juldyzdardan quralǵan qatysýshylar anyqtaldy.
Irikteýdiń úshinshi kezeńinde Alaý estafetasyna qatysqysy kelgender www.torchrelay.kz saıtyndaǵy ótinimdi toltyryp, alaý kóterýshi atandy.
2017 jyldyń 25 qańtarynda Astanada 28-shi Dúnıejúzilik qysqy ýnıversıada Alaýy tutatylmaq. Bes kún aralyǵynda árbir oblys ortalyǵynda Alaýdy jaǵýǵa arnalǵan saltanatty shara jáne Estafetanyń óz kezeńi ótkiziletin bolady. Alaý estafetasy óńirlerde ótkizilgennen keıin 16 alaý kóterýshi Alaýdy Almatyǵa jetkizip, Ýnıversıadanyń ashylý saltanaty kezinde bir tostaǵanǵa biriktirmek. Stýdenttik oıyndar astanasynda alaýdy 100 adam kóterip ótedi.
Jalpy alǵanda, Ýnıversıada alaýy 22 500-den astam shaqyrymǵa sozylǵan jolmen júrip ótpek, onyń 200 shaqyrymynda alaý kóterýshiler júrmek. Stýdenttik oıyndardyń resmı áýetasymaldaýshysy – «Eır Astana» kompanııasy alaýdy aımaqtardan Almatyǵa jetkizedi. Osylaısha, Estafeta alaýy qalǵan 22 300 shaqyrymdy Almatyǵa deıingi jolda ótkizedi. Al 29 qańtarda Ýnıversıada-2017 is-sharasynyń resmı ashylý saltanaty ótedi.
Alaý estafetasynyń aımaqtardaǵy baǵdarlamasyn keltire ketsek, 25 qańtarda Astanada Ýnıversıada Alaýy tutatylǵan soń, 26 qańtarda Alaý oblys ortalyqtarynda О́skemen, Pavlodar, Kókshetaý, Petropavl, Qostanaı jáne Qaraǵandy qalalarynda jaǵylady. Al 27 qańtarda Aqtóbe, Oral, Atyraý jáne Aqtaý qalalarynda tutatylmaq. Qyzylorda, Shymkent, Taraz, Taldyqorǵan qalalary 28 qańtarda kezek alsa, 29 qańtarda Almatydaǵy Alaýdy tutatý saltanaty ál-Farabı atyndaǵy QazUÝ-de ótpek.
Mıra BAIBEK,
«Egemen Qazaqstan»
ALMATY