Astana qalalyq ishki ister departamenti kóshi-qon basqarmasynyń basshysy Gúlvıra Dónenbaevanyń aıtýynsha, búginde ýaqytsha tirkeý máselesin san-saqa júgirtýdiń qajeti joq. Atalǵan shara úı salyǵyna, da, kommýnaldyq tólemderge de áser etpeıdi, dep xabarlaıdy QazAqparat.
«Tipti, páter jaldaýshyny ýaqytsha tirkeýge qoısa, ol menshik quqyǵyna talasa alady degen úreı de bar. Biraq biz ylǵı aıtamyz, ýaqytsha tirkeý arqyly ondaı áreketterdi jasaý múmkin emes. Sosyn ol jerde ýaqytsha tirkeýdiń naqty merzimi jazylady. Ýaqyt ótkende ol adamdy avtomatty túrde tirkeýden shyǵaryp tastaıdy. Al kommýnaldyq tólemderge keler bolsaq, ýaqytsha tirkeýdiń oǵan esh qatysy joq. Bizdiń derekter bazalarymyz eki bólek jáne bir-birimen baılanyspaǵan. Mysaly, Qazaqstan Respýblıkasy azamattaryn qujattandyrý bazasy bar. Tirkeýden keıin barlyq derekter jeke tulǵalar málimetteriniń memlekettik bazasyna túsedi. Oǵan barlyq memlekettik organdar kire alady. Ony kúndelikti jumys úshin paıdalanady. Basqa maqsattar úshin paıdalanýǵa ruqsat joq. Kommýnaldyq qyzmettermen aınalysatyn kompanııalar oǵan kire almaıdy», – dedi Dónenbaeva
Aıta keteıik, qańtardyń 7-si kúni kúshine engen zańnamaǵa sáıkes, ýaqytsha tirkelmegeni úshin ákimshilik jaza, ıaǵnı aıyppul salý sharasy engizilgen bolatyn. Bir aıdyń ishinde tek túsindirý men eskertý jumystary júrgiziledi. Al aqpannyń 7-sinen bastap turaqty jáne ýaqytsha tirkeýge turmaǵan azamattarǵa aıyppul salynady. Úıdiń qujattary daıyn bolmasa, jumys orny, ıa bolmasa týystardyń mekenjaıy boıynsha ýaqytsha tirkeýge turýǵa bolady.