Álemdik boks serııasy (WSB) aıasynda ótetin komandalyq lıganyń jetinshi maýsymy aqpanda bastalady. Elimizdiń namysyn abyroımen qorǵap júrgen «Astana Arlans» osy lıganyń eki dúrkin chempıony jáne lıga qorytyndysy boıynsha eshqashan úshinshi orynnan tómen túspegen.
Álemdik boks serııasy 12 komandany kontınentke saı 3 topqa bólgen. Qazaqstandyq komanda jobaǵa qaıta engen qytaılyq «China Dragons», ótken jyly ózderiniń birinshi maýsymynda úshinshi orynǵa taban tiregen «Uzbek Tigers» jáne reseılik «Russian boxing team» komandalarymen shaıqasady. Aǵa jattyqtyrýshy Nurlan Aqúrpekov, klýbtyń bapker-keńesshisi Myrzaǵalı Aıtjanov, Núrken Andasov, Ermek Ertaev jáne 1999 jyldyń bokstan álem chempıony, Olımpıada oıyndarynyń eki márte kúmis júldegeri Bolat Jumadilov bapkerler tobyn qurady.
Arlandar sapynyń negizgi quramyna 20 boksshy enip otyr. On salmaqtyń árbirine eki boksshydan shaqyrylǵan. Olardyń qatarynda Ilııas Súleımenov, Oljas Sáttibaev, Aslanbek Shymbergenov, Janbolat Qydyrbaev, Nurdáýlet Jarmanov sııaqty talantty da tájirıbeli boksshylarymyz bar. Negizgi quramnan bólek taǵy 17 boksshy óz kezekterin rezervte maýsym boıy kútetin bolady. «Astana Arlandary» birinshi jekpe-jegin 3 aqpanda Reseıde ótkizse, 18 aqpanda óz jankúıerleriniń aldynda ózbek boksshylaryn qabyldaıdy.
Astana Arlans-tyń negizgi quramy:
49 keli. Temirtas Júsipov, Ermek Madıev
52 keli. Oljas Sáttibaev, Anýar Muzafarov
56 keli. Ilııas Súleımenov, Janbolat Qydyrbaev
60 keli. Zákir Safıýllın, Mırasáli Sársenov
64 keli. Dilmurat Mijitov, Maqsat Jeksenbi
69 keli. Aslanbek Shymbergenov, Qanaǵat Maralov
75 keli. Erik Áljanov, Saparbaı Aıdarov
81 keli. Nurdáýlet Jarmanov, Arman Rysbek
91 keli. Anton Penchýk, Muhamedjan Erkin
+ 91 keli. Oljas Buqaev, Dmıtrıı Zısko
Daıyndaǵan Bı-Bolat Seıtaq