О́ńirlerdegi jurtshylyqpen kezdesýler

Almatyda jumys babyndaǵy saparmen júrgen Senat depýtaty Tóleýbek Muqashev qalanyń Qoǵamdyq keńes múshelerimen kezdesti. Shara barysynda keńestiń Parlament Senatymen ózara is-qımyl tetikteri, sondaı-aq almatylyqtardy alańdatatyn negizgi máseleler talqylandy. Elimizdegi azamattardy ýaqytsha tirkeý týraly jańa zań erejelerine qatysty jaǵdaılarǵa erekshe nazar aýdaryldy. Kezdesýge qatysýshylar qabyldanǵan zań erejeleriniń búgingi ahýalǵa beıimdelýi jóninde ońtaıly sheshim izdestirý úshin egjeı-tegjeıli taldaý jasaýǵa arnalǵan birlesken jumys qajet ekeni týraly sheshim qabyldady.  Bul maqsatqa Almaty qalasynyń Qoǵamdyq keńes quramynda jumys toby qurylatyn boldy. T.Muqashev Qazaqstan Kásipkerler forýmy keńesiniń jáne Almaty Kásipkerler assosıasııasynyń múshelerimen de kezdesti. Kásipkerler qaýymdastyǵynyń ókilderi monopolıster jumysyn retke keltirý, kvazımemlekettik sektordyń, ekologııa, sondaı-aq memlekettik satyp alý salalaryndaǵy jumystardyń ashyqtyǵyn arttyrýǵa qatysty saýaldar qoıdy. Kezdesýge qatysýshylar kúndizgi ýaqytta avtomobılderdiń jaqynǵa túsetin jaryǵyn qalalarda jaǵyp júrý týraly talaptyń qajettigine kúmán keltirdi. Kásipkerlerdiń pikirinshe, bul erejeniń Almaty qalasyna qatysty ekologııalyq zardaptaryna tolyqtaı saraptama júrgizilýi tıis.  Aınash ESALI, «Egemen Qazaqstan» ALMATY *** Aqtóbe oblysynda jumys babyndaǵy saparmen júrgen Parlament Senatynyń depýtaty Eleýsin Saǵyndyqov jergilikti turǵyndarmen kezdesti jáne aımaqtaǵy birqatar kásiporyndardy aralady.  Senator memlekettik baǵdarlama­lar­dy, onyń ishinde aýyl sharýashyly­ǵyn damytýǵa arnalǵan jobalardy iske asyrý barysymen tanysty. 2016 jyly aýyl sharýashylyǵy salasy boıynsha 72 óndiristik kooperatıv quryldy, jumyspen qamtýdyń keshendi jospary boıynsha 29 myń adam jumyspen qamtyldy. Indýstrııalandyrý kartasy aıasynda 6 mıllıard teńgeniń 3 jobasy iske qosyldy, onyń ishinde «Nurly jer» baǵdarlamasy aıasynda jyldam salynatyn úı qurylysynyń alǵashqy jobasyn iske asyratyn  úı qurylysy kombınaty paıdalanýǵa berildi. Satybaldy SÁÝIRBAI, «Egemen Qazaqstan» Aqtóbe oblysy *** Parlament Májilisiniń depýtaty Zaǵıpa Balıeva Almaty oblysy Eńbekshiqazaq aýdany turǵyndarymen kezdesti. Kezdesýge oblystyq, aýdandyq máslıhattardyń depýtattary, memlekettik organdar men mekemeler basshylary jáne okrýg ákimderi qatysty.  Z.Balıevanyń aıtýynsha, ár otbasynyń keminde bir múshesi kásippen aınalysýy tıis. Ol úshin jyl basynan beri memleket tarapynan qoldaý eki esege kúsheıgen. Iаǵnı, kásipkerlikti ashýdaǵy shekteýler alyndy,  múmkindikter molaıdy. «Qazir kez kelgen jumys isteımin deýshige jol ashyq. Keshege deıin arnaıy jeńildetilgen nesıe beretin memlekettik baǵdarlamalar tek aýyl sharýashylyǵyn damytý maqsatyna jumyldyrylǵan bolsa, búginde 20 mıllıon teńgege deıin nesıe alyp, ózge de bıznesti bastaýǵa bolady», – dedi depýtat. Zaǵıpa Iаhııaqyzy memlekettik «Nurly jer» baǵdarlamasynyń jaı-japsaryn da túsindirdi. «Búginde qol-aıaǵy balǵadaı er-azamattar úı kezeginde tur. Odan qalsa, túrli syltaýlar aıtyp, shaǵymdanady. Dál osyndaı er-azamattarǵa aıtaıyn, kedeılik – asqynǵan aýrý. Onyń aldyn alý úshin eńbekpen shuǵyldaný qajet», – dedi Z.Balıeva. Jıyn barysynda qatysýshylar usynys-pikirlerin jetkizip, oılarynda júrgen saýaldaryna jaýap aldy. Nurbol ÁLDIBAEV, «Egemen Qazaqstan» Almaty oblysy *** Senat depýtattary Murat Baqtııaruly men Bekmyrza Elamanov aımaqtarǵa saparlar aıasynda Qyzylorda oblysyndaǵy Shıeli aýdanynda boldy. Senatorlar Shıeli aýdanyndaǵy «Nurly jer» baǵdarlamasy boıynsha úı salýǵa bólingen 2,8 mıllıard teńgeniń ıgerilýi jáne aımaqtyń áleýmettik-ekonomıkalyq damý barysymen tanysty. Jergilikti halyqpen kezdesýler barysynda aýdan ortalyǵyndaǵy ınfraqurylymdy damytýdyń keleshegi sóz boldy. Depýtattar Aqmaıa aýylyndaǵy kúrishshilermen, Aral aýdanyndaǵy   shabaq ósiretin «Qosjar» pıtomnıgindegi jumysshylarmen júzdesip, eńbek ónimdiligin arttyrý máselelerin talqylady. Qazirgi kezde balyq zaýytynda jeke áriptestik negizindegi ekonomıkalyq qatynastar nyǵaıyp keledi. Balyqshylar qaýymy qazirgi kezde 4 myń tonna balyq ónimderin shetelge eksportqa shyǵaryp otyr. Senatorlar sapary Qazaly jáne Qarmaqshy aýdandarynda jalǵasty. Olar birqatar áleýmettik nysandardy aralap, mektepter men aýrýhanalar jáne basqa da uıymdarda boldy, eńbek ujymdarymen kezdesti. Erjan BAITILES, «Egemen Qazaqstan» Qyzylorda oblysy *** Mańǵystaý oblysynda jumys saparymen júrgen Senat depýtattary Mıhaıl Bortnık pen Baqtybaı Shelpekov Munaıly aýdanynda boldy. Aýdandyq máslıhat depýtattarymen kezdesý barysynda senatorlar Parlamenttiń zań shyǵarý qyzmeti men Senattaǵy «О́ńir» tobynyń jumysy týraly áńgimeledi, sondaı-aq aımaqtyń ózekti máselelerin talqylady. M.Bortnık pen B.Shelpekov aýdandyq Halyqqa qyzmet kórsetý ortalyǵynda da boldy. Depýtattar kezektiń joqtyǵyn jáne turatyn jeri boıynsha ýaqytsha mindetti tirkelý erejeleriniń kúshine enýine baılanysty Halyqqa qyzmet kórsetý ortalyǵy qyzmetkerleriniń sapaly jumysyn atap ótti. Parlamentshiler Mańǵystaý oblysyn­daǵy qurǵaqtaǵy negizgi qaqpa bolyp tabylatyn Mańǵystaý temir jol vokzalynda da boldy. Jolaýshylar tasymalynyń ulǵaıýyna baılanysty 2016 jyly vokzal mańy aýmaǵyn jańǵyrtýǵa jergilikti bıýdjetten 71 mıllıon teńge bólingen eken. M.Bortnık pen B.Shelpekov, sondaı-aq Jańaózen qalasynda da boldy. Gúlaıym ShYNTEMIRQYZY, «Egemen Qazaqstan» Mańǵystaý oblysy *** Parlament Senatynyń depýtaty Ertarǵyn Astaev Jambyl oblysyndaǵy agrarlyq sektordyń damý barysymen tanysty. Aımaqqa sapar barysynda senator birqatar kásiporyndar men sharýa qojalyqtarynda bolyp, jergilikti turǵyndarmen kezdesti. Jambyl aýdanyndaǵy Shaıqoryq aýylynda E. Astaev aýyl sharýashylyǵyn órkendetýdiń qazirgi zamanǵy tásilderin qoldana otyryp, jemis-jıdek ósiretin «Shyǵys baǵy» JShS jumysymen tanys­ty. 50 gektar jerge alma baǵyn ósirý qolǵa alynyp, aımaqta alǵash ret tamshylatyp sýarý júıesi engizildi. E.Astaevtyń aıtýynsha, almanyń kóptegen túrlerin ósirýge múmkindik beretin aımaqtyń tabıǵı jaǵdaıy baqsha sharýashylyǵyna jańa tehnologııalardy keńinen qoldanýǵa yqpal etedi. Depýtat jergilikti jemis-jıdekterdi budan bylaı eksportqa shyǵarý qolǵa alynatynyna senim artatynyn jetkizdi. Senator asyl tuqymdy jylqy men múıizdi iri qara ósiriletin «Birlik» sharýa qojalyǵynda da boldy. Sapardy qorytyndylaı kelip, depýtat memlekettik organdar basshy­lary­nyń aýyl sharýashylyǵy ónimderin óndirýshilerdiń muqtajdyqtaryna nazar aýdarýy jáne qoldaý bildirýi qajettigi týraly oılaryn ortaǵa saldy. Oralhan DÁÝIT, «Egemen Qazaqstan» Jambyl oblysy *** Qostanaı oblysynda jumys babyndaǵy saparmen júrgen senatorlar Serik Bekturǵanov pen Jeńis Nurǵalıev Áýlıekól aýdanynda boldy. Aýdan ortalyǵyndaǵy kezdesýde agrarlyq sektor men kásipkerlikti qoldaý, aýyldaǵy oqý sapasyn arttyrý men mamandar daıarlaý máselelerine depýtattar basa nazar aýdardy.  Aýyldyq okrýgterdiń ákimderimen, aýdandyq memlekettik bólimderdiń jáne seriktestikterdiń basshylarymen júzdesýlerde aýdannyń kóptegen memlekettik baǵdarlamalarǵa qatysyp jatqany ári aımaq ekonomıkasyn damytýǵa eleýli úles qosyp jatqany aıtyldy. Qazirgi kezde aýdan aýmaǵynda 300-ge jýyq aýyl sharýashylyǵy qurylymdary jumys isteıdi. J.Nurǵalıev birqatar jobalardyń tabysty iske asyp jatqany týraly aıta kelip, Qostanaı oblysynyń ekonomıka­lyq kórsetkishterin joǵary baǵalady. «Kásipkerlikti qoldaý kartasyna 358 mıllıard teńgeniń 20 jobasy  endi jáne 5400 jumys oryndary ashyldy. О́tken jyly Qostanaı oblysynda aýyl sharýashylyǵynyń damýy 3,2 paıyzdy kórsetti», – dedi senator. Kezdesýde jańa jyldaǵy mıkro­nesıeleý baǵdarlamasynyń sharttary týraly da áńgime boldy. «Aýyl sharýa­shylyǵyn qoldaý qory aýyl eńbek­kerlerin qoldaýdy jalǵastyra beredi. Tek sandarda ǵana ózgerister bar. Birin­shiden, baǵdarlamada beriletin nesıe 6 paıyzdan aspaýy tıis ekeni týraly qatań jazylǵan. Ekinshiden, beriletin nesıeler 8 myń aılyq eseptik kórsetkishke deıin bolýy tıis, bıyl onyń bir qolǵa tıetini 18 mıllıon teńgeni quraıdy», dedi S.Bekturǵanov. Kezdesýden keıin depýtattar tehnıka mamandaryn daıarlaıtyn Áýlıekól aýyl sharýashylyǵy kolledjiniń jumysymen tanysty. Názıra JÁRIMBETOVA, «Egemen Qazaqstan» Qostanaı oblysy *** «Nur Otan» partııasy fraksııasynyń músheleri, Parlament Májilisiniń depýtattary Nurlan Dýlatbekov, Gúlnar Bıjanova, Snejanna Imasheva jáne Serik Qusaıynov Qaraǵandy qalasynyń Dostyq úıinde ótken oblystyq jáne qalalyq Qoǵamdyq keńesterdiń otyrysyna qatysty. Májilis depýtattary zańnamalardy, normatıvtik-quqyqtyq aktilerdi jetildirý jóninde naqty usynystar jınaqtaý maqsatynda aımaqtyń jurt­shylyǵymen kezdesýler ótkizilip jat­qanyn atap ótti. Is-sharanyń aıasynda Qoǵamdyq keńesterdiń memleket pen qoǵamnyń ózara qarym-qatynasynyń jańa pishinderin qalyptastyrýdaǵy mańyzdy róli aıqyndaldy. Keńes músheleriniń aıtýynsha, olarǵa aımaq turǵyndarynyń atynan  túsken ótinishteri kóbinese densaýlyq saq­taý­ǵa, bilim berýge, kommýnaldyq sharýa­shy­­­lyq­qa, jer máselelerine, eńbek daý­lary­na jáne ekologııaǵa qatysty bolyp keledi. Otyrys barysynda Shahtınsk qalasy Qoǵamdyq keńesiniń tóraǵasy Marat Dúısekeevtiń qulaǵan úıden japa shekkenderge qoldaý kórsetý týraly aqparaty tyńdaldy. Osy tragedııadan japa shekkenderge kómek kórsetý úshin Parlament Májilisiniń depýtattary bir kúndik jalaqylaryn aýdarǵan bolatyn.  Qaırat ÁBILDINOV, «Egemen Qazaqstan» Qaraǵandy oblysy *** Parlament Májilisiniń depýtattary Petropavl aýyr mashına jasaý zaýytynyń qyzmetkerlerimen kezdesti. Kezdesýde májilismender Máýlen Áshimbaev, Qýanysh Sultanov, Sergeı Zvolskıı, Petr Sharapaev jáne Murat Temirjanov eńbekshilermen birqatar máselelerdi talqylady jáne zań shyǵarý qyzmeti týraly áńgimeledi.  Búgingi tańda kásiporyn Qazaqstan naryǵynda suranysqa ıeniń biri bolyp tabylady. Bul – 50 jyl boıy munaı óndirýshi kompanııalar úshin, tehnıkany jáne munaı-hımııa men munaı óńdeý kásiporyndary úshin jabdyqtar shyǵaratyn elimizdegi jalǵyz zaýyt. Zaýyt Qytaı, Reseı, Japonııa, Germanııa, Norvegııa, Anglııa, AQSh, Kanada, Italııa, Belarýs iri kompanııalarymen yntymaqtasady. Osynda 1000-ǵa jýyq adam eńbek etýde, ortasha jalaqy 95 myń teńgeni quraıdy. О́ndiris salasynyń jumys­shylarymen kezdesý kezinde májilismender ónerkásiptik óndiristiń eleýli ósýin jáne Soltústik Qazaqstanda birqatar memlekettik baǵdarlamalardy iske asyrýda tabystylyǵyn atap ótti. Qyzmetkerlermen áńgime barysynda depýtattar kásiporyn qyzmetine joǵary baǵa berdi jáne zaýyt qyzmetkerleriniń otandyq munaı salasynyń damýyna zor úles qosyp otyrǵanyn atap ótti. Depýtattar oblys aktıviniń jınalysyna qatysty, «Nur Otan» partııa­sy aımaqtyq fılıalynyń qoǵamdyq qabyldaý bólmesinde azamattardy jeke qabyldady jáne agrarlyq kompanııalar: «Damý» qorynyń jáne Kásipkerler palatasynyń ókilderimen kezdesti.  О́mir ESQALI, «Egemen Qazaqstan» Soltústik Qazaqstan oblysy *** Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Sergeı Plotnıkovtyń Shyǵys Qazaqstan oblysyna jumys babyndaǵy sapary barysynda «Jaıylymdar týraly» zań jobasyn qaraý kezindegi ózekti máseleler talqylandy.  О́skemende jergilikti bılik ókilderimen, sharýashylyq sýbek­tileriniń basshylarymen, aýyldyq okrýgter ákimderimen kezdesý boldy. Depýtat talqylanyp otyrǵan taqy­ryp­tyń mańyzdylyǵyn, aýyl sharýa­shy­lyǵy ónimderiniń óndirisin ulǵaıtý jáne aýyl turǵyndarynyń ál-aýqatyn arttyrý úshin jaıylymdardy tıimdi paıdalanýdyń mańyzy zor ekenin atap ótti. Zań jobasy Májiliste maquldanyp, Senatqa kelgeni jáne onyń birinshi oqylymda tujyrymdamalyq turǵyda qaralǵany týraly aıtyldy. Senator aýyl eńbekkerleriniń birqatar saýaldaryna jaýap berip, túsindirmeleri men usynystaryn tyńdady. S. Plotnıkovtyń aıtýyn­sha, mundaı pikirlesý adamdarǵa aqyldasýdyń, olardyń múddelerin eskerýdiń tamasha múmkindigin týǵyzady. Depýtat Shyǵys Qazaqstan aýyl sharýashylyǵy ǵylymı-zertteý ınstıtýtynda da kezdesý ótkizdi. Onyń basshysy Aleksandr Tomashenko ujym­nyń ótken jylǵy qyzmetine toqtalyp, aldaǵy jumys josparlarymen tanystyrdy. Dýman ANASh, «Egemen Qazaqstan» Shyǵys Qazaqstan oblysy