«Astana» Prezıdenttik kásipqoı sport klýbynyń qataryna kiretin Astana Motorsports komandasy «Dakar» ekstrım-reıdin sátti aıaqtady.
Astana Motorsports baspasóz qyzmetiniń habarlaýynsha, jeńil ekıpaj T2 standarttyq kólikter klassynda 3-oryndy ıelendi, al júk kóligi 26-oryndy ıelendi.
Eki apta ishinde qatysýshylar Paragvaı, Bolıvııa jáne Argentına elderi aýmaǵynan toǵyz myń kılometr júrip ótti.
«Astana» Prezıdenttik klýby «Dakarǵa» eki ekıpaj shyǵardy. Júk ekıpajy (T4) quramynda «Dakar-2012» qola júldegeri pılot Artýr Ardavıchýs, shtýrman Serj Brınkens jáne mehanık Maıkl Hıýsman MAN TGS kóliginde boldy. Jeńil ekıpajda T2 sanatyndaǵy FIA 2015 rallı reıdteri boıynsha Álem kýbogynyń jeńimpazy pılot Denıs Berezovskıı jáne shtýrman Alekseı Nıkıjeva shyqty. Olar Production klassyndaǵy Toyota Land Cruiser 200 kóligimen qatysty. Uıymdastyrýshylardyń aıtýynsha, bıyl «Dakar» erekshe qıyn boldy. Aýa raıynyń qolaısyzdyǵy da ózindik áserin tıgizgen. Osynyń saldarynan kóptegen lıderler týrnır kestesiniń tómengi jaǵynda qalyp qoıǵan.
«Bolıvııadaǵy tolassyz jaýǵan jańbyr, sel óz qıyndyǵyn týdyrmaı qoımady. Biraq jarys osyndaı kedergilerdi jeńýimen qyzyqty. Al bári ońaı bolsa, ony «Dakar» dep aıtýǵa kelmeıdi», – dedi rallı-marafonnyń dırektory Mark Koma.
Argentınanyń Býenos-Aıres qalasynda ótken qorytyndy 12-transkontınentaldyq marafony óte jyldam ótti. Kóshbasshylar buǵan deıingi kezeńderde jetken óz pozısııalaryn ustap qalýdy maqsat etti. Bul kúngi jalpy qashyqtyq 64 km arnaıy aýmaqty eseptegende 786 shaqyrymdy qurady.
Júk ekıpajy kezeńdi 16-orynda, al «Dakardy» 26-orynda aıaqtady. Al T2 standarttyq kólikter klassynda jeńil ekıpaj 3-orynda, kezeńde 31-orynda, «absolıýtte» 29-orynda keldi.