Byltyr Ońtústik Qazaqstan oblysynda 79 195 sábı ómirge keldi, onyń 765-i – egiz, dep habarlaıdy OQO ákiminiń baspasóz qyzmeti.
Elimizdegi árbir besinshi bala Ońtústik Qazaqstanda ómirge kelse, sonyń ishinde bala týýdyń eń joǵary kórsetkishi boıynsha Shymkent qalasy alda tur. Máselen, ótken jyly qalada 36 191 bala dúnıege kelgen. Al, oblys aýdandarynyń arasynda bala týý sany jaǵynan Túrkistan qalasy aldyńǵy oryndy ıelenip otyr. Onda ótken jyly 8742 bala dúnıege kelgen. Odan keıingi orynda Maqtaral aýdany tur – 7880 bala. Al, Saryaǵash aýdanynda 7425 náreste dúnıege kelgen.
Elimiz Táýelsizdigin alǵannan keıin densaýlyq saqtaý salasyn qarjylandyrýdy arttyrý esebinen jańa medısınalyq mekemeler salyndy.
Materıaldyq-tehnıkalyq jabdyqtaý jaqsardy. Zamanaýı qural-jabdyqtar men qondyrǵylar oblys ortalyǵynda ǵana emes, aýdandar men qalalarda ornatyldy. Osynyń nátıjesinde, óńirde ana men bala ólimi azaıyp, týý kórsetkishi artyp keledi.