Búgin QR Joǵarǵy Sotynda «Zańdylyq» aqparattyq-taldamalyq júıesiniń jobasy tanystyryldy. Atalǵan júıe qylmystyq isterdi onlaın rejimde tergeýge jol ashady.
«Endigi kezek qylmystyq is júrgizýdi tolyqtaı aqparattandyrýda tur. Osy maqsatta búgin sot pen prokýratýranyń «Zańdylyq» aqparattyq-taldamalyq júıesiniń jobasyn tanystyryp otyrmyz. Bul júıeni óndirýdiń basty maqsaty qylmystyq proseske «aqyldy» tehnologııalardy engizýdiń kezekti qadamyna arnalǵan», - dep toqtaldy QR Joǵarǵy Sotynyń tóraǵasy Qaırat Mámı.
Osy oraıda ol jańa elektrondy qyzmetterdiń arqasynda azamattar sot satylary boıynsha artyq júgiristen qutqarylǵanyn atap ótti. «О́tken jyly «Sot kabıneti» arqyly sottarǵa 756 myńnan astam elektrondy qujat kelip tústi. Bizdiń basty talabymyz - turǵyndar úshin jeńil ári yńǵaıly tetikterdi qurý», - dedi ol.
«Zańdylyq» jobasynyń maqsaty - sotqa deıingi tergep-tekserýdiń biryńǵaı tizilimi men sot organdarynyń «Tórelik» aqparattyq-taldamalyq júıesin ıntegrasııalaý esebinen qylmystyq úderistiń sapasy arttyrý. Sonymen qatar bul baǵytta qylmystyq isterdi tergeý men sotta qaraý barysyndaǵy úderiske qatysýshylardyń zań buzýshylyq boıynsha shaǵymdaryn azaıtýǵa negizdelgen.
«Zańdylyq»jobasy prokýrorlardyń, sottardyń kemshilikterin der kezinde anyqtaýǵa múmkindik beredi. Sondaı-aq qatelikterdi joıýǵa yqpal etedi. Júıe aıasynda esh paıdasy joq qaǵaz aınalymynan qutylýǵa jaǵdaı jasalmaq. Sonymen qatar júıeni engizgennen keıin qarjylyq jáne ózge de kúrdeli isterden basqalary 2-3 kún tergeletin bolady. Al qazir qylmystyq isti tergeýdiń ortasha merzimi 2-3 aıdy quraıdy.
Birqatar uıymdastyrýshylyq rásimder aıaqtalǵan soń, joba 2017 jyldyń shildesinde qoldanysqa engizilmek.