QR Ulttyq banki krıptovalıýtalardy paıdalana otyryp halyqqa ınvestısııalyq qyzmet kórsetetin uıymdardyń qyzmetin rettemeıdi. Bul týraly QazAqparat habarlady.
«QR Ulttyq Banki qazirgi ýaqytta Qazaqstanda krıptovalıýtalardy paıdalana otyryp halyqqa ınvestısııalyq qyzmet kórsetetin uıymdardyń jumys isteıtindigin habarlaıdy. Bul uıymdar qazaqstandyqtarǵa krıptovalıýtalardy satyp alý maqsatynda qolma-qol aqsha engizý jolymen, sol sııaqty qolma-qol aqshasyz tártippen ınternet jelisi arqyly olardyń baǵdarlamalaryna qatysýdy usynady», – delingen habarlamada.
Bul uıymdardyń ókilderi satyp alǵan krıptovalıýtalar boıynsha jeke tulǵa klıentterge qarjy naryǵyndaǵy qoldanystaǵy mólsherlemelermen salystyrýǵa kelmeıtin, belgili bir ýaqyt ótkennen keıin joǵary kiristerdi (tym artyq paıyzdar) ýáde etedi. Joǵary syıaqylar aınalymdaǵy aqshanyń bolýyn qamtamasyz ete otyryp, qatysýshylardyń aıtarlyqtaı sanyn jáne jańa klıentterdiń aqshalaı túsimderin tartý esebinen tólenedi.
Aqsha aınalymy (aǵyny) toqtatylǵan nemese jetispegen kezde aǵymdaǵy mindettemelerdi óteý úshin bul uıymdar jabylyp, barlyq tólemder toqtatylady.
«Krıptovalıýtalardyń resmı aqsha birligine ne ózge de naqty aktıvterge baılanysy, sondaı-aq tıisti qamtamasyz etýi jáne olarǵa qyzmet kórsetý operasııalary boıynsha zań turǵysynan jaýapty sýbektilerge qatysy joq. Budan basqa, krıptovalıýtalardyń aınalys prosesi ortalyqtandyrylmaǵan, jáne ony retteý múmkindigi joq», – delingen vedomstvonyń baspasóz qyzmeti.
Bul rette osy uıymdardyń paıdasyna aqsha engizgen qatysýshylardyń salynǵan aqshany qaıtarýynyń quqyqtyq kepildikteri joq, sebebi Qazaqstan Respýblıkasynyń azamattyq zańnamasyna sáıkes bul uıymǵa kirý jáne jeke tulǵalardyń aqsha engizýi erikti negizde júzege asyrylady jáne ol qandaı da bolmasyn qujattandyrylǵan rásimdermen bekitilmeıdi.