Kishkene kenish sarqyldy

Shyǵys óńirindegi Iýbıleıno-Snegırıhın kenishindegi ken óndirý jumys­tary toqtady. Ken­niń qosym­sha qory tolyǵymen ıgeril­gendik­ten, Kaz Minerals toby osyndaı sheshim qabyldap otyr. Bul – top quramyndaǵy eń kishkentaı kenish. 2016 jyldyń 9 aıynda atalǵan kenish­ten quramynda 7,1 myń tonna mys bar 392 myń tonna ken óndirilgen. Al tórtinshi toq­sannyń óndiristik nátı­jeleri qańtar aıynyń sońyna deıin qory­tyndylanbaq. Kenishtegi jumys vahtalyq ádispen júrgizilip keldi. Korporatıvtik baılanystar depar­tamentiniń oblystaǵy menedjeri Ermek Dúzkenovtiń aıtýynsha, búginde kenish ujymynda ońtaılandyrý jumystary júrgizilýde. 2016 jyldyń jeltoqsanyna deıin shahtada 158 adam jumys istese, sonyń ishindegi 35 adam «Shyǵystústimet» JShS-niń basqa kásiporyndaryna jumysqa ornalasty, 59 adam óz erkimen jumystan ketýge bel býdy. Al ońtaılandyrý jumystary 27 adamdy qamtyp otyr. Qalǵan 37 adam qazirgi ýaqytta kenishtiń kúzet jumystary men sý shyǵarý júıesiniń jumysyn qamtamasyz etedi. Olardyń eńbek sharttarynyń merzimderi shahtany jabý jumystary aıaqtalǵanǵa deıin uzartyldy. Kompanııada bekitilgen jospar boıynsha qazirgi ýaqytta Iýbıleıno-Snegı­rıhın ken ornyn jabý jobasy jasalyp, qorlardy esepten shyǵa­rý, júretin jáne turaqty jab­dyq­tar­dy kompanııanyń basqa kásip­oryn­­daryna jetkizý jumystary júr­gizilý­de. Joba 2017 jyldyń sońy­­na deıin jasalyp, bekitilgennen keıin ken ornyn jabý jumystary 2019 jyldyń birinshi toqsanynda aıaqtal­maq. Tıisti memlekettik organdar bekit­­ken ken ornyn jabý jobasy júz­e­ge asqannan keıin jer qoınaýyn paı­da­la­ný kelisimi memleketke qaı­tary­lady. Kom­pa­nııa úıindiler men jumys kezin­de paı­dalanylǵan jer ýchas­ke­lerin qalpyna keltirý jumystaryn atqarady. Iýbıleıno-Snegırıhın shahtasynda jerasty tásilimen quramynda mys-myrysh jáne qorǵasyn bar tústi metall keni óndirildi. Kenishten shyqqan ken Nıkolaev ken baıytý fabrıkasynda óńdeldi. Glýbokoe aýdanynda ornalasqan ken orny 1959 jyly ashylyp, 1975 jyly barlaý jumystary júrgizilgennen keıin memleket balansyna berilgen bolatyn. Ken orny 2002 jyldan bastap paıdalanyldy. Dýman ANASh, «Egemen Qazaqstan» Shyǵys Qazaqstan oblysy, Glýbokoe aýdany