28-shi qysqy dúnıejúzilik Ýnıversıada oıyndaryna keletin týrıster Almatynyń kásipkerlerine 2 mlrd teńgeden astam paıda tabýǵa múmkindik beredi. Al Global destination cities index málimeti boıynsha, Almatyǵa kelgen sheteldik týrıstiń bir kúndik shyǵyny 245 dollar bolady. Bul týraly búgin Úkimet otyrysynda qala ákimi Baýyrjan Baıbek aıtty.
"Global destination cities index málimeti boıynsha, Almatyǵa kelgen sheteldik týrıstiń bir kúndik shyǵyny 245 dollar. Al 5 myń týrıst qalada bes kún aıaldaıdy desek, onda qalanyń shaǵyn jáne orta kásipkerleri osy ýaqytta 2 mlrd teńge tabys tabady. Tek qatysýshy memleketterdiń ózderi atletıkalyq aýylda turý úshin 1 mln eýro alyp keledi. Sonymen qatar Ýnıversıada dıreksııasynyń usynysymen qaladaǵy 8 qonaqúıge týrıster jatqyzylady", - deıdi Baıbek.
Esterińizge sala ketsek, Ýnıversıada-2017 29 qańtar men 8 aqpan aralyǵynda Almaty qalasynda ótedi.