Qutqarýshylar bıyl kóktemde Soltústik Qazaqstan oblysyn 2016 jylǵy sý tasqynynan da úlken topan sý basatynyn boljap otyr, dep habarlaıdy QazAqparat.
Qar bıiktigi men bıyl óńirde jaýǵan qardyń kólemi, ortasha jyldyq kórsetkishpen salystyrǵanda, normadan eki esege asyp ketken. Ylǵal qory Qyzyljar aýdanynda normadan 412%-ǵa, Maǵjan Jumabaev aýdanynda - 359%-ǵa, Taıynshyda - 295%-ǵa asyp ketken. Byltyr kóktemde jerdiń betki qabatynyń qatýy eldi mekenderdiń sý basýyna ákep soqtyrǵan bolatyn. Bıyl jerdiń qatýy byltyrǵy kórsetkishten 15-55 sm-ge asyp túsedi.
Sınoptıkterdiń boljamynsha, Soltústik Qazaqstan oblysynda qańtar aıynda sibirden kelgen antısıklonnyń áserinen aýa raıy -38 gradýsqa deıin sýytady. Ol kezde jerdiń qabaty odan beter qata túsedi. Naýryzdyń úshinshi jartysynda kún kúrt jylyp, +8 gradýsqa deıin ysıdy. Qutqarýshylardyń aıtýynsha, ondaıda qar tez erip, tasqyn sýdyń paıda bolýyna áser etedi. Oblystaǵy barlyq akvatorııa tolyp tur jáne 20-dan astam eldi mekendi, temirjol men tas joldardy shaıyp ketý qaýpi bar.
TJ aldyn alý bóliminiń bastyǵy Ashat Bákishevtiń aıtýynsha, 2016 jylǵy jáne bunyń aldyndaǵy jaǵdaılar jiti zertteldi. Nátıjesinde oblystaǵy 95 eldi mekendi topan sý basýy yqtımal degen boljam jasaldy. Onda 1,5 myńnan astam úı men 4,7 myń halyq turyp jatyr. Sonymen qatar jalpy uzyndyǵy 50 shaqyrym bolatyn 153 avtomobıl jáne temirjol ýchaskesi qaýip ústinde. Sondaı-aq Petropavldyń shetindegi birqatar aýdandardy sý basýy múmkin.
«Qazirgi ýaqytta oblystaǵy sý tasqyndaryn aldyn alýǵa baǵyttalǵan shuǵyl sharalarǵa arnalǵan qarajat kólemi 226 mln. teńgeni quraıdy», - deıdi Ashat Bákishev.
Aıta keteıik, byltyr 30 jylda eń iri sý tasqyny oryn alǵan bolatyn. Oblysta 400-den astam úı men 35 eldi meken sýdyń astynda qaldy. Tasqyn sýdyń zardaptaryn joıý úshin QR Úkimetiniń qorynan 1,3 mlrd. teńge bólingen.