Ertegiden kelgen óner

Marqakóldeı sulý óńir­de týyp, sýretshi bolmaý múmkin emes-aý. Biraq, bala Qabdy­rahmannyń balaýsa qııalyn baý­rap, sýret ónerine eliktirip jetelegen bir qudiret qazaqtyń ertegileri men batyrlar jyry bolypty. Aýyl kitaphanasy úıiniń tap qasynda. Jarty kitaphanany bir ózi taýysyp oqyǵan shyǵar. Ertegi-jyrlardy basyna jastap qoıyp oqıdy. Kózine elestetip, kitaptaǵy sýretterge qarap Qobylandy men Alpamystyń, Er Tóstik pen Kerqula atty Ken­debaıdyń, tazsha bala men mys­tan kempirdiń sýretterin salady. Tarıhymyzǵa degen ańsar qumar­lyq, halqymyzdyń jan dúnıe­sine, salt-dástúrine degen zeıin-ynta osylaı bastaý alǵan eken. Arman-ańsary Almaty kór­kemsýret ýchılıshesine alyp kelgen. Odan soń Sh.Aımanov atyn­daǵy «Qazaqfılm» kınostýdııasynda sýretshi-mýl­tıplıkator bolyp istep, «Qań­baq shal», «Dastarqan», «Kish­kentaı órmekshi», taǵy basqa mýltfılmderdi jasaýǵa qa­tys­ty. Al endi osy kınostýdııa joldama­symen Máskeýde VGIK-tiń kıno sýretshileri fakýltetinde oqyǵan jyldar óresin órletip, sanasyn serpilte túsip edi. Elimiz táýelsizdik alǵan soń tarıhı taqyrypqa jol ashyldy. Osynaý bos keńistikti toltyrýǵa Q.Otarbaı da qulshyna kiristi. Qazaq tarıhynan óz ta­qyrybyn tapty, qylqalammen ózindik kesek oılaryn kesteleı bildi. Tarıh qoınaýynan, halyq ómirinen marjan tergen Qabdyrahman kartınalarynyń boıaýlary shynshyl da syrshyl, tereń oıly, jarqyn muńdy bolyp keledi. Búginde aǵa býyn sýretshiler qataryndaǵy Qabdyrahman Otar­baı týyndylarynyń negizgi taqy­ryby qazaq tarıhymen únde­sip, sol tuma bulaq kózinen sýyrt­paqtap syr tartýymen tar­tymdy. Muny, ásirese, onyń «Tobylǵy», «Túrki», «Qazaq han­dyǵynyń shańyraq kóterýi», «Aqboz atty buǵalyqtaý» sııaqty kartınalarynan kórip, kózaıym bolarymyz anyq. Al sýretshi Qabdyrahmannyń jazýshylyǵy bólek áńgime. Jaı jazýshy emes, satırık. Iаǵnı, kózmergendigine qosa, sózmergen. «Zamandasym Azanbek» kartı­nasynyń taǵdyrly keıipkeriniń kózindegi ot osynaý talant ıesi­niń bolmys-sıpatyn tanytyp turǵandaı. О́ner zertteýshi Qabyl Halyquly: «Sýretshi eńbek­terinde boıaý, maǵyna, pishin jáne plastıkalyq erekshelikter biregeı sheshim tapqan», dese, ádil baǵa osy. Qorǵanbek AMANJOL, «Egemen Qazaqstan»