Jańa jylda «Habar» telearnasynda dybys rejısseri bolyp jumys isteıtin Nurbı ápkemiz úıine qonaqqa shaqyryp, biraz óner adamdarymen dastarqandas boldym. Belgili asaba Aıdar Boltaev áńgimeni jaqsy aıtady eken.
– Osy jazda úıge kelinshegimniń atasy men apasy kelip, biraz kún qonaq boldy, – deıdi Aıdekeń. – Qarııa kisiler ǵoı. Birde kúndiz jumystan sharshap kelip, dıvanǵa qısaıyp edim, kózim ilinip ketipti. Televızordyń daýsynan oıanyp kettim. Sóıtsem, qaıyn apam týra televızordyń aldyndaǵy oryndyqqa jaıǵasyp, bir baǵdarlamany kórip otyr eken. Kórgende qarııanyń qulaǵy jaqsy estimeıdi... Basyn buryp, oń qulaǵyn televızorǵa tosyp, dıktordyń aıtqanyn tyńdap otyr. Baǵdarlama – Uly Otan soǵysy jyldarynda tylda eńbek etken áıelder týraly eken. Dıktor qońyr daýsymen aýyldaǵy áıelderdiń aýyr jumysyn, tynymsyz tirligin sýrettep aıtyp jatyr. Oıyma qýlyq kele qaldy... Apam týra aldymda teris qarap otyr. Dıvannyń bas jaǵynda turǵan pýltti aldym da, televızordyń daýysyn jaılap óshirip, aqyryn daýyspen álgi dıktordyń maqamymen ózim sóılep kettim.
– Iá, soǵys jyldarynda aýyldyń áıelderi erkekterdiń ornynda aıanbaı eńbek etti. Olardyń osynaý eńbegin keıingi urpaq eshqashan umytpaıdy.
Apam aq oramalynyń qulaq tusyn túrip qoıyp, moınyn buryp, berilip tyńdap otyr.
– Ásirese, Jambyl oblysy, Talas aýdany, Qyzyláýit aýylynyń áıelderi tańnyń atysy, kúnniń batysy demeı, tynym tappastan kolhozdyń jumysyn japyryp istedi...
Apam televızorǵa jalt qarady. Kózi jypylyq-jypylyq etti ǵoı deımin. Men ári qaraı jalǵastyra berdim:
– Sonyń ishinde, ásirese, osy aýyldyń turǵyny Meıramgúl Qazıevanyń eńbegin erekshe bólip aıtýǵa bolady. Ol kisi qyzylshashy da boldy, arba da aıdady, shóp te shapty... Uly Jeńiske óz úlesin aıamaı qosqan apamyzdyń erligi kez kelgen marapatqa laıyq.
Apam otyrǵan oryndyǵynan qulap qala jazdady. Ashanada shaı iship otyrǵan shalyna aıqaılap jatyr:
– Oıbaı, shal-aý, tezirek beri kel... Men týraly aıtyp jatyr...
Súrinip-qabynyp shaly da jetti.
Men osy qarbalasta televızordyń daýysyn qaıta shyǵaryp, uıyqtap jatqan adam qusap, teris burylyp jata berdim.
Al sonymen, atam men apam ekeýiniń «aıtysy» bastaldy. Atam aıtady: «Sen týraly «Habardyń» aıtýy múmkin emes», deıdi. Apam: «О́z qulaǵymmen estidim. Men týraly aıtty... Qyzyláýit aýyly dedi ǵoı», dep ol qoımaıdy. Jastyqtyń astyna tyǵylyp alyp, kúlkiden tunshyǵyp ólip baramyn...
... Aıdar aǵanyń áńgimesine ábden kúldik. Qalaı aıtsaq ta, qarııalarymyz aman bolsyn!
Oralhan DÁÝIT,
«Egemen Qazaqstan»