Parlament Májilisiniń spıkeri Nurlan Nyǵmatýlın palatanyń 2017 jyldaǵy birinshi otyrysyn ashty. Ol bul jıyn osy jyldaǵy birinshi otyrys ekenin, sapaly zańmen qamtý jolynda atqarylar jumystyń kóp ekenin aıtty.
Ol bıylǵy birinshi otyrysta depýtattardyń jergilikti ózindik basqarýdy damytý máseleleri boıynsha zań jobasyn birinshi oqylymda qaraıtynyn habarlady.
"Aldaǵy ýaqytta densaýlyq saqtaý jáne áleýmettik-eńbek salasyndaǵy máseleler boıynsha zań jobasyn qaraımyz. Sondaı-aq, jol qozǵalysy, aqparat jáne kommýnıkasııa máseleleri, kommersııalyq emes uıymdardyń qyzmeti sııaqty mańyzdy zań jobalaryn muqııat qaraýymyz kerek. Jumys josparynda kodekster bar - salyq pen jer kodeksteri. Zań jobalaryn qaraý kezinde azamattyq qoǵam ókilderimen únemi dıalog bolyp, jalǵasyn tabýy kerek jáne palata jumysynyń aqparattyq ashyqtyǵy qamtamasyz etilýi tıis. Ortalyq atqarýshy organdardyń qyzmetiniń túrli aspektin parlamenttik baqylaýdy qamtýda úkimet saǵatynyń mańyzy zor", - dedi Nurlan Nyǵmatýlın.
Tómengi palatanyń tóraǵasynyń aıtýynsha, bul sessııanyń sońyna deıin Májilis depýtattarynyń aldynda úkimet saǵaty aıasynda úkimettiń 15 mınıstriniń 11-i qazaqstandyq qoǵamnyń nazaryndaǵy problemalarǵa qatysty sóz sóıleıdi.
"Bul birinshi kezekte ishki jáne syrtqy saıasat máseleleri, eldiń ekonomıkalyq jáne áleýmettik ómiri máseleleri. Parlamenttik tyńdaýlar ótkiziledi, osy máselede eń ózekti "Qazaqstan Respýblıkasynda dári quraldarymen qamatamsyz etý jáne farmasevtıkalyq salalardyń damý jaǵdaıy týraly" taqyryby boıynsha sheshim qabyldanǵan. Osylaısha, Májilis qyzmetiniń negizgi baǵyty zań shyǵarý sapasy, barlyq memlekettik organnyń zańdy júzege asyrýyn baqylaýdy kúsheıtý bolady. Atqarylar jumys kóp, qaýyrt jumys", - dep qorytyndylady sózin Nyǵmatýlın.