Jańa jyldan bastap jastar praktıkasynan ótýge Halyqty jumyspen qamtý ortalyǵyna júgengen oqý oryndarynyń túlekterine tólenetin jalaqy 71 900 teńge quraıdy, dep habarlady abctv.kz.
Astana qalasynyń Halyqty jumyspen qamtý ortalyǵynyń ýaqytsha jumysqa ornalastyrý bólimi basshysy Qalamqas Kúlshımanovanyń aıtýynsha, jastar praktıkasyna qatysýshylardyń eńbekaqysy memlekettik bıýdjet qarajatynan sýbsıdııalanady jáne bilim berý túlekterine alǵashqy tájirıbe alý úshin júrgiziledi.
Jastar praktıkasy – bul alǵan mamandyǵy boıynsha alǵashqy jumys tájirıbesin alý maqsatymen júrgiziletin oqý oryndarynyń túlekterin ýaqytsha jumysqa ornalastyrý. О́tken jyly jastar praktıkasyna 661 túlek jumysqa ornalastyrylǵan. Ol kezde jalaqy 53 800 teńgeni quraǵan. Al bıylǵy jyly jastar praktıkasynyń jalaqysy 71 900 teńgeni qurady. Barlyq áleýmettik shegerimderdi eskergende jastar praktıkasyna qatysýshylar 60 684 teńge alatyn bolady.
Aıta keteıik, jastar praktıkasyna sońǵy úsh jyldyń túlekteri, jumyssyz retinde tirkelgender jáne olardyń jasy 29-dan aspaǵandar joldana alady. Jumys berýshi jumyssyzdy jumysqa alý týraly sheshim qabyldaǵan jaǵdaıda, jumys berýshi onymen Qazaqstan Respýblıkasynyń Eńbek kodeksine sáıkes eńbek kelisimshartyna otyrady. Jastar praktıkasynyń uzaqtyǵy 6 aıdan aspaıdy.