Aýzyńnan Qarabulaq aýyly degen sóz shyqsa Qazaqstannyń túkpir-túkpirindegi et satýshylar «Saıramdaǵy ǵoı» deıdi. О́ıtkeni, alaqandaı ǵana jerde otyrǵan jan sany qyryq tórt myńǵa jýyq aýyldyń dańqy eńbekqorlyǵymen shyqqan. Soltústik oblystardyń birneshe aýdanynyń turǵyn sanyna para-par aýyldyń halqy negizinen úsh túrli kásippen aınalysady. Júk mashınalarymen sonaý Reseıdiń Qıyr Shyǵysyna deıin shyǵandap ketetin qarabulaqtyq kásipkerler aparǵan kókónisterin ótkizgennen keıin qur kelmeı, sol jaqtan munda ótimdi dúnıelerdi tıeı keledi.
Qarabulaqtyń ataqty qara bazaryna barsańyz ózbektiń tarıhqa aty shyqqan Alaı bazaryna kirgendeı bolasyz. Janyńyzǵa ne kerek bári bar. Orystyń júk tasýǵa arnalǵan Vladımır jylqysynyń túr-túrin osy bazardan kóresiz. Jarqyratyp qazy berip jarytpaǵanymen qara eti mol. Reseılikter jylqy etin tutynýǵa onshalyqty qulyqty emes. Baǵasy anaǵurlym arzan. Sondyqtan, esik pen tórdeı, semizdikten jaryla jazdap turǵan jylqylaryn qarabulaqtyqtar sý teginge alady dese de bolady. Bazar mańy qaptaǵan dámhana. Qarabulaqta negizinen ózbek halqy turady. Olardyń shyǵys tamaqtaryna suranysy joǵary ekendigin bilesiz.
Jumyssyzy joq osy aýylda jerden bólek jetpeıtin eń qat dúnıe-kógildir otynnyń joqtyǵy edi. Endi aldynnyń gazǵa qoly jetti. Ázirge 1 myń otbasynyń úıine kógildir otyn kirdi.
Kósheishilik gaz qubyryn júrgizý qurylysynyń aıaqtalý saltanatyna oblys ákimi Janseıit Túımebaev pen «QazTransGaz Aımaq» AQ Ońtústik Qazaqstan óndiristik fılıaly dırektorynyń birinshi orynbasary Asqar Máýkenov, jergilikti turǵyndar men BAQ ókilderi qatysty.
Turǵyndardyń qýanyshymen bólise kelgen aımaq basshysy, bul jetistiktiń egemendi elimizdiń árbir jyly qalyptasý, tolysý, ósip-órkendeý jyldarynda múmkin bolyp otyrǵanyn aıtty.
– Egemendigimizdiń shırek ǵasyrynda el ıgiligi úshin kóptegen ister atqaryldy. Alaqandaı aýyldarda zaman talabyna saı mektepter men balabaqshalar, medısınalyq mekemeler salyndy. Qanshama shaqyrymdardy quraıtyn ishki joldar jóndeldi. О́ńirimizdiń kóptegen eldi mekenderi taza sýmen qamtylyp, turǵyndar tabıǵı gazǵa qol jetkizýde. Sonyń bir aıǵaǵy, búgin ózderińizben birge 43 myńnan astam adamdy tabıǵı gazben qamtıtyn kósheishilik gaz qubyryn saltanatty túrde iske qosyp otyrmyz, – dedi ákim.
Atalǵan eldi mekendi tabıǵı gazben qamtamasyz etý jumystary 2013 jyly bastalǵan bolatyn. Jobalaý-smetalyq qujattamaǵa sáıkes, osy merzim ishinde 315,5 shaqyrym gaz qubyrlary júrgizilip, 3719 ShGTP (shkaftyq gaz taratý pýnkti) ornatyldy. Eldi mekendi tabıǵı otynǵa qosý jumystaryna oblystyq bıýdjetten 2 mlrd teńgeden astam qarajat bólingen.
Qarabulaq halqynyń sany 44 myńnan asqanymen saı qýalaı qonyp, sıyrdyń búıregindeı pyshyrap qonǵan aýyl. Aýyldyń ortasyn taý silemderindegi qar sýynan quralǵan aryndy Qarasý ózeni jaryp ótedi.
Eńbek dese janyp túsetin qarabulaqtyqtardyń qýanyshy sheksiz. Kásipkerlikti óristetýge kerek jylýdy kómirden alyp kelgen dıqandardyń jylyjaılary kógildir otynǵa qosylyp jatyr. Bul eńbektiń tıimdiligin áldeneshe ese asyrady. Iаǵnı, kókónis túri kóbeıip, aımaqta azyq-túlik baǵasyn retteýde jaqsy múmkindik týady.
Baqtııar TAIJAN,
«Egemen Qazaqstan»
Ońtústik Qazaqstan oblysy