«Býrevestnık-Almaty» voleıbol komandasyn 3:0 esebimen jeńgen altaılyqtar ýaqytynan buryn birinshiliktiń chempıony ataǵyna qol jetkizdi. Osylaısha, eki márte el chempıony atanyp otyr.
Pavlodar oblysynyń «Pavlodar» komandasy ekinshi oryndy ıelense, «TNK «Kazhrom» komandasy úshinshi orynda qanaǵat tutty. Marapattaý rásimine ShQO ákimi Danıal Ahmetov qatysyp, júldegerlerdi quttyqtady.
«Bul bizdiń oblystyń ǵana emes barlyq voleıbolsúıer qaýymnyń jeńisi dep bilemin. О́ńirimizde osy sport túriniń damýyna atsalysyp, klýbty qoldap otyrǵan oblys basshylyǵyna alǵysymdy bildiremin», – dedi «Altaı» klýbynyń bas bapkeri Igor Nıkolchenko.
Aıta keteıik, ótken maýsymda «Altaı» alǵash ret el birinshiligin jeńip alǵan edi. Ol kezde de chempıonat aıaqtalmaı jatyp jeńiske jetken bolatyn.
Azamat QASYM,
«Egemen Qazaqstan»