Orta salmaqta WBO nusqasy boıynsha álem chempıony Bıllı Djo Sonders (24-0, 12KO) dál osy salmaqtaǵy WBA (Super), IBO, WBC jáne IBF belbeýleriniń ıesi qazaqstandyq Gennadıı Golovkınge (37-0, 33 KO) qarsy ótýi múmkin jekpe-jegi jaıly oı bólisti.
«Kelissózder jóninde biraz aqparat oqydym. Men eshnársege qarsy emespin. Bul aıqasta másele aqshada emes. Bul keshten tabatyn tabysymnyń sońǵy tıynyna deıin qaldyrmaı ákeme beremin. О́zim aqshaǵa zárý emespin. Men tek sharshy alańǵa shyǵyp, óz kúshimdi dáleldegim keledi. Álemniń men týraly qate pikirde ekenin kórsetkim keledi.
Men Golovkınniń Djeıkobspen jekpe-jegin keıinirek kórdim. Qazaqstandyq boksshyny jeńe alatynyma senimdimin. Ol áli men sııaqty myqty boksshymen judyryqtaspaǵanyna senimdimin. Oǵan qalaı tótep berý kerek ekenin jaqsy bilemin. Onyń qımyl-qozǵalysyna qarap qandaı ádis qoldanatynyńyzdy jyldam oılaýyńyz kerek», – dep jazady espn.com.
Sonymen qatar, ol Gennadııdiń kezdesý jónindegi kelisimshartty tezirek usynýy kerektigin de aıtty. Sebebi, qajetti deńgeıine jetý úshin ári aryqtaýy úshin ýaqyt kerek.
«Men ótken jyly tek bir-aq ret jekpe-jek ótkizdim. Al qazir mine, sáýir aıy da bolyp qaldy. Bárine daıyn bolýym kerek. Qazir shamamen tórt kılogramm artyq salmaǵym bar. Biraz ýaqytymdy jattyǵýǵa arnaýym qajet. Eger Gennadıı menimen qolǵap túıistirgisi kelse, ýaqyt joǵaltpaı tezirek kelisimshartyn usynsyn», – dedi Bıllı Djo Sonders.
Aıta keteıik, qazaqstandyq boksshynyń kelesi qarsylasy dál osy Bıllı Djo Sonders bolatyny habarlanǵan. Al olardyń boks keshi Qazaqstanda ótýi múmkin.