Qasym aqyn mereıtoıy jaqyn. Qazaq poezııasy alybynyń týǵanyna 100 jyl tolýy tamyz aıynda atap ótilgeli otyr. Osyǵan baılanysty búginde oǵan daıyndyq is-sharalary qyzý júrgizilý ústinde.
Oblys ákiminiń orynbasary Arman Qyryqbaev jetekshilik etetin mereıtoılyq komıssııanyń kezekti májilisinde ázirlik barysy taǵy bir pysyqtaldy. Onda Qazaqstan Jazýshylar odaǵy tóraǵasynyń birinshi orynbasary Ǵalym Jaılybaı, belgili aqyn Serik Turǵynbek, aıtysker Amanjol Áltaı jáne basqa da qatysýshylar óz oı-usynystaryn ortaǵa salyp, halqymyzǵa ortaq toıdy este qalarlyqtaı ótkizý jóninde aqyl-keńes qosty.
Aıqyn NESIPBAI, Qaraǵandy.
Ardagerler jańa úıge qonystandy. Qyzylorda qalasynyń «Astana» shaǵyn aýdanynda 30 páterli jaldyq úı turǵyndardyń ıgiligine berildi. Saltanatty sharaǵa oblys ákimi Bolatbek Qýandyqov qatysty. – Elbasynyń bastamasymen qolǵa alynǵan «turǵyn úı» baǵdarlamasy aıasynda oblys ortalyǵynda kóp qabatty 41 úı salynyp, 1362 turǵyn jeke páterge ıe boldy. Jańadan boı kótergen «Syrdarııa» shaǵyn aýdany – osy baǵdarlamanyń naqty jemisi,– dedi Bolatbek Baıanuly. Al «Astana» shaǵyn aýdanynyń alǵashqy turǵyndary UOS-nyń ardagerleri ekenin aıtqan abzal. Bul úıdiń basty ereksheligi, birinshi qabatynda keńse ornalastyrýǵa múmkindik mol. Jaqyn arada Aqmeshit-Syrdarııa ortalyq meshitine deıin osyndaı 13 úı salynbaqshy.
Erjan BAITILES, Qyzylorda.
Túrkııadan tabyspen oraldy. О́skemendegi «Úmit» balalar úıin uzaq jyldardan beri tájirıbeli pedagog, jetim balalardyń «ekinshi» anasy Maıra Beısaqanova basqaryp keledi. Jaqynda balalar úıiniń tárbıelenýshileri Túrkııanyń Fethıe qalasynda ótken «Altyn kún» halyqaralyq festıvalinen tabysty oraldy. Dúnıe júziniń 23 eliniń eń tańdaýly degen ónerli jastary qatysqan baıqaýda óskemendik órender ekinshi oryndy ıelenip, óz ónerlerimen kópshilikti tánti etti. «Úmit» balalar úıiniń ónerpazdary buǵan deıin Resseıde, Eýropa elderiniń birneshe qalalarynda da jeńimpaz atanǵan edi. Al respýblıkalyq jarystarda da úmittikter aldyńǵy qatarda. О́ńir basshysy B. Saparbaev balalar úıine jan-jaqty kómek jasap turady.
Ońdasyn ELÝBAI, О́skemen.
Qala hanymdarynyń forýmy. О́tken aptada Táýelsizdiktiń 20 jyldyǵyna oraı Oral qalasy hanymdarynyń II forýmy ótti. Onda áıelderdiń qoǵamdaǵy orny men róli talqylandy. Aqyn Aqushtap Baqtygereeva men eńbek ardageri Maǵrıpa Ysqaqova áıelder eń aldymen ana bolý úshin jaratylǵany jóninde áleýmettik oı-pikir sabaqtady. Sondaı-aq forýmda oblystaǵy úkimettik emes áıelder uıymdarynyń genderlik saıasatty júrgizý jónindegi qyzmetteri de sarapqa salyndy. Jıyn barysynda bir top áıelderge Elbasynyń Alǵys haty tabys etildi.
Temir QUSAIYN, Oral.
Ana men bala alleıasy ashyldy. О́tken aptada Pavlodardaǵy perınataldyq perzenthana ortalyǵynyń aýlasynda Qazaqstan isker áıelderi qaýymdastyǵy qoǵamdyq birlestigi men oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııanyń bastamasymen «Ana men bala» alleıasy ashyldy. Táýelsizdiktiń 20 jyldyǵyna oraı bastalǵan ıgi sharaǵa oblys ákiminiń orynbasary Álııa Ǵalymova jáne qaýymdastyq músheleri qatysyp, jas kóshetter otyrǵyzdy. Aldaǵy ýaqytta osy aýlaǵa qushaǵynda sábıi bar ana beınesi salynǵan mármár tas belgi ornatylady.
Farıda BYQAI, Pavlodar.
Jalyndy jastar bas qosty. Elimizdiń boıtumary – Táýelsizdik merekesine degen maǵynasy zor aýqymdy sharalar Jetisý jerinde jarasym taýyp, uıymshyldyqpen ótkizilip keledi. Alakól aýdanynda birneshe eldi meken jastarynyń bas qosqan «Biz – táýelsizdik pen jasampazdyqtyń jalyndy jastarymyz!» atty forýmy ótti. Rýhanı birlik – halyqtar dostyǵynyń qaınar kózi ekendigin aıǵaqtaǵan oıjaılaýlyqtar óz ónerlerin jan-jaqty kórsetýge umtyldy. Osy aýyldaǵy tatar etnomádenı ortalyǵy uıymdastyrǵan sherý de dittegen maqsatyna jetti. Olar dostyqtyń almaıtyn qamaly, aspaıtyn asýy joqtyǵyn kórsete bildi. Alakóldikter atalǵan forýmdy dýmandatyp ótkizdi. «Jasyl el» baǵdarlamasy aıasynda «Meniń jasyl kóshem» aksııasymen mereıli merekege oraı osy kúni 2000 túp aǵash kóshetteri tigildi. Forýmǵa qatysýshylar tabıǵattyń tepe-teńdigin saqtaý arqyly týǵan jerdi kórkeıtýge ózderiniń qomaqty úlesterin qosty.
Kúmisjan BAIJAN, Almaty oblysy.
Salaǵa serpin bergen bastama. Kókshetaý qalalyq ákimdiginde jurtshylyq júregin jelpintken memorandýmǵa qol qoıyldy. Bastama ıeleri – Aqmola oblystyq qurylys kásiporyndarynyń keńesi men «BTA Bank» AQ Kókshetaý fılıaly ústimizdegi jyly oblys ortalyǵynda 60 páterlik jańa turǵyn úı qurylysyn júrgizip, paıdalanýǵa berýdi josparlaýda. Jańa jobanyń basty ereksheligi, eń aldymen qurylys salasynyń ókilderi men 2011-2015 jyldarǵa arnalǵan Memlekettik turǵyn úı qurylysy baǵdarlamasyna enbeıtin azamattardyń qonys toı qýanyshyn kóbeıtý bolyp tabylady. Keńes tóraǵasy T.Shapaǵatov pen «BTA Bank» fılıalynyń dırektory B.Ospanovtyń aıtýynsha, bul bastama qaladaǵy turǵyn úı kezegin azaıtýmen qatar, qurylys ındýstrııasy ókilderiniń qolyn uzartyp, salanyń mereıin ósiredi.
Baqbergen AMALBEK, Aqmola oblysy.