Qazaqstan Respýblıkasy Prezıdentiniń 2011 jylǵy
17 mamyrdaǵy №83 Jarlyǵymen bekitilgen
«Qazaqstan Respýblıkasynyń Táýelsizdigine 20 jyl» merekelik medalimen nagradtaý qaǵıdalary 1. Osy Qaǵıdalar «Qazaqstan Respýblıkasynyń Táýelsizdigine 20 jyl» merekelik medalimen (budan ári – merekelik medal) nagradtaý tártibin retteıdi. 2. Merekelik medalmen Qazaqstan Respýblıkasy memlekettiliginiń qalyptasýyna, egemendiginiń nyǵaıýy men áleýmettik-ekonomıkalyq damýyna eleýli úles qosqan Qazaqstan Respýblıkasynyń azamattary jáne shetel azamattary nagradtalady. 3. Merekelik medalmen nagradtaýǵa usynystardy Qazaqstan Respýblıkasynyń Prezıdentine Qazaqstan Respýblıkasynyń Parlamenti, Úkimeti, mınıstrlikteri, ózge de ortalyq memlekettik organdary, Astana jáne Almaty qalalarynyń, oblystardyń ákimderi, sondaı-aq qoǵamdyq uıymdar engizedi. 4. Merekelik medaldi Qazaqstan Respýblıkasynyń Prezıdenti tapsyrady. Qazaqstan Respýblıkasy Prezıdentiniń atynan jáne onyń tapsyrmasy boıynsha merekelik medaldi, sonymen qatar: 1) Qazaqstan Respýblıkasynyń Memlekettik hatshysy; 2) Astana jáne Almaty qalalarynyń, oblystardyń ákimderi, sondaı-aq Memleket basshysy osyǵan ýákilettik bergen ózge de laýazymdy adamdar tapsyra alady. Nagradtalǵan adamǵa medalmen qosa belgilengen úlgidegi kýálik tabys etiledi. 5. Merekelik medaldi tapsyrý saltanatty jaǵdaıda júrgiziledi jáne nagradtalýshynyń jeke ózine tapsyrylady. Tapsyrý aldynda Qazaqstan Respýblıkasy Prezıdentiniń nagradtaý týraly Jarlyǵy jarııa etiledi. 6. Merekelik medal sol jaq omyraýǵa taǵylady. Qazaqstan Respýblıkasynyń memlekettik nagradalary bolǵan jaǵdaıda olardan keıin ornalasady. 7. Merekelik medaldiń tabys etilgendigi týraly nagradtaýǵa arnalǵan tizimge tıisti jazba jazylady. Tabys etilmegen medalder men olardyń kýálikteri qaıtarylý sebepteri kórsetile otyryp, Qazaqstan Respýblıkasy Prezıdenti Is basqarmasynyń Ordender qoımasyna qaıtarylady, bul týraly tizimderge tıisti belgi qoıylady. Júrgizilgen nagradtaýlardyń esebin, sondaı-aq merekelik medaldardyń tapsyrylý barysy týraly eseptelikti Qazaqstan Respýblıkasy Prezıdentiniń Ákimshiligi júrgizedi.Qazaqstan Respýblıkasy Prezıdentiniń 2011 jylǵy
17 mamyrdaǵy №83 Jarlyǵymen bekitilgen
«Qazaqstan Respýblıkasynyń Táýelsizdigine 20 jyl» merekelik medaliniń sıpattamasy «Qazaqstan Respýblıkasynyń Táýelsizdigine 20 jyl» merekelik medali (budan ári – merekelik medal) dıametri 34 mm durys sheńber nysanynda bolady. Merekelik medaldiń bet jaǵynyń ústińgi bóliginde mereıtoı emblemasynyń beınesi – nóli jelbiregen jalaýdyń aıasynda rámizdelgen sáýleli kún túrinde oryndalǵan bederli 20 sany ornalasqan. Tómengi jaǵynda Aqorda ǵımaratynyń bederli beınesi ornalasqan. Merekelik medaldiń syrtqy betiniń ortańǵy bóliginde «Qazaqstan Respýblıkasynyń Táýelsizdigine 20 jyl» bederli jazýy ornalasqan. Merekelik medal sary tústi metaldan (jezden) daıyndalady. Merekelik medal qulaqsha men shyǵyrshyq arqyly qatqyl lentamen qaptalǵan eni 32 mm jáne bıiktigi 50 mm bolatyn taǵanǵa jalǵanady. Lenta 16 mm qyzyl jáne kók tústi eki jolaqtan quralǵan. Ortasynda tiginen turǵan bederli lavr butaǵy túrindegi jezden jasalǵan eni 8 mm japsyrma ornalasqan. Merekelik medal kıimge vızorly bekitkishi bar túıreýish arqyly bekitiledi.