Sol jaılaý shirkin...
jatqan bir shóbi jaıqalyp,
О́risten mama sıyrlar qaıtar naıqalyp.
Shar saýlyqtaryń jaılaýdyń salqyn túninde,
Mekirenip qoıyp, jatatyn kúıis qaıtaryp.
Qulaǵyn tigip, shóp basy sybdyr etkenge,
Jylqylar anaý turady múlgip tepseńde.
Tek jetim qulyn baýyryna yǵyp baıtaldyń,
Alystan talyp baıǵyzdyń úni jetkenge.
Úkiniń kózin uıaltqan sútteı jaryq tún,
Jylqy jýsatqan tynyshtyǵyńa zaryqpyn.
Qara qosymnyń jyrtyǵyn jamap juldyzdar...
Jasaǵan Ie-aı, nyǵmetińe qaryqpyn.
Jalbyzdysaıdyń saýmaly túni-aı... jalǵanda,
О́zegim ańqyp, ózgege shólim qanǵan ba?!
Sup-sýyq bulaq jarqyrap aǵyp jatady,
Sap-salqyn aıdyń sáýlesi tunǵan ańǵarda.
Aq shaǵı bulttar... Altaıdyń asqar taýynda,
Móp-móldir ómir mórlenip qalǵan jadymda.
Keń dúnııanyń kerile jutqan juparyn,
Jaılaýdyń sol bir baıansyz rahat shaǵynda.
Ularbek NURǴALYMULY.