Abaı atyndaǵy Qazaq memlekettik akademııalyq opera jáne balet teatrynyń elordadaǵy gastroldik sapary teatr repertýaryndaǵy opera jáne baletterdiń eń úzdik kórinisterinen quralǵan gala-konsertpen qorytyndylandy.
El Táýelsizdiginiń 20 jyldyq merekesi túrli mádenı sharalarmen áspettelip, qundy tartýlarmen atap ótilýde. Sonyń ishinde ózindik órnekterimen ózgeshe bolyp kóringeni – bas qalaǵa Abaı atyndaǵy opera jáne balet teatrynyń gastroldik saparmen kelýi. Torqaly toıǵa shashý retinde usynylǵan operalar men baletterdiń qaı-qaısysy da kórermen tarapynan ystyq yqylasqa ıe boldy. Taǵy bir este qalatyn tusy – munda elimizge belgili sahna tarlandary óner kórsetip, kórkem beıneler asqan shabytpen órildi. Ulttyq operadan A.Jubanov pen L.Hamıdıdiń «Abaı» operasynan basty partııalar shyrqalyp, álemniń klassıkalyq qoıylymdarynan Dj.Verdıdiń «Travıata», R.Vagnerdiń «Tangeızer», G.Donısettıdiń «Mahabbat shyryny» spektaklderiniń áserli sátteri ádemi jetkizildi. A.Hachatýrıanniń «Spartak», S.Prokofevtiń «Romeo men Djýletta» baletterinen úzindiler bas teatr mektebine tán boıaýmen tartymdy oınaldy. Jalpy abaılyqtardyń elordadaǵy kúnderi jarqyn únmen jan dúnıeni baýraǵan aıshyqty betterge toly boldy. Jurtshylyq ózderi unatyp tyńdaıtyn tanymal ártisterimen emen-jarqyn qaýyshqan tamasha sátterdi bastan keshti. Qazaqstannyń halyq ártisi Nurjamal Úsenbaevanyń somdaǵan Ajaryna rıza bolǵan kórermen yqylasynan zal ishi dúr silkindi. QR eńbek sińirgen qaıratkerleri Jámıla Baspaqova men Shahımardan Ábilov ónerimen kesteli órilgen beıneler umytylmastaı áser qaldyrdy. Ár opera men balet jaıynda uzaq áńgime qozǵaýǵa bolar edi. Munyń bári ózge teatrlardyń sahnasynda da kórermenin úıirip, úzdik úlgige aınalǵan týyndylar desek te, Abaı atyndaǵy opera jáne balet teatrynyń ár keıipkerdi, bolmysty túıindeýi basqalardyń salǵan soqpaǵyna, jattandy jolǵa túsip ketpeıdi. Sheberlik mektebi qalyptasqan ortada tyńnan jańalyqtardyń shyǵyp jatýy zańdylyq bolatyny sııaqty, mundaǵy somdalǵan beıneler de kezinde teatr synshylarynan baǵasyn alyp, baǵytyn aıqyndaǵan taǵdyrlar bolyp sanalady. Olardyń kıim úlgilerinen bastap, ún, is-qımyl, áreketterine deıin qaıtalanbas órnekte bederlenýi sol úzilmeı kele jatqan ejelgi mekteptiń arqasy ekeni belgili. Torqaly toıǵa toǵyz tartý usynǵan óner ujymynyń gastroldik sapary memleket merekesiniń ajaryn kirgizgen sharalardyń biri bolyp qalǵanynda daý joq.
Ajar OSPANOVA.