Juma kúni NATO kúshteri Lıvııa basshysy Mýamar Kaddafıdiń el astanasy Trıpolı men onyń mańaıyndaǵy áskerı nysandaryna ondaǵan soqqy jasady, dep habarlady Assoshıeıted Press agenttigi.
Agenttiktiń atap kórsetkenindeı, avıasoqqylar osy apta ishindegi eń qýatty soqqylardyń biri bolǵan. Osy jóninde málimet bergen úkimet ókiliniń aıtýynsha, shabýyl tańerteńgisin erte jasalǵan. Ázirge qaza bolǵandar men zardap shekkender týraly málimetter kelip túspegen kórinedi. Bir belgilisi, alıans áskerleri qalada Kaddafı ǵana emes, beıbit turǵyndardyń da bar ekendigin eskermeı otyr.
Esirtkini nasıhattady dep aıyptady
Reseıdiń esirtkige baqylaý jasaý jónindegi qyzmet basshysy Vıktor Ivanov BUU-nyń Esirtkige qarsy saıasat jónindegi jahandyq komıssııasyn esirtkini nasıhattap otyr dep aıyptady.
RIA Novostı agenttiginiń habarlaýynsha, Ivanov mundaı málimdemeni atalǵan komıssııa músheleriniń esirtki zattarynyń bir bóligin ashyq aınalymǵa shyǵarý týraly úndeýine túsinik bere otyryp jasaǵan. Esirtkiniń bir bóligin ashyq aınalymǵa shyǵarý týraly baıandama 19 mamannyń, qoǵam qaıratkerleri men saıasatkerlerdiń qatysýymen ázirlengen bolatyn. Olar uzaq jyldar boıy esirtkige qarsy júrgizilgen kúrestiń mıllıondaǵan adamdardyń ajalyna sebepker bolǵanyn, aqshanyń shyǵyndalǵanyn aıtyp, esirtkimen kúresýshilerdiń jeńilis tapqanyn málimdegen.
Sapasyz vıskıden ýlanǵan
Túrkııanyń aýyl sharýashylyǵy mınıstrligi reseılik týrısterdiń teńiz saıahaty kezinde ýlanýyna sapasyz vıskıdiń sebepker bolǵanyn rastady.
Atalǵan vedomstvo reseılikterdiń krýız barysynda paıdalanǵan alkogoldi ishimdikterine muqııat taldaý jasaı kelip, onyń quramynda metıl spırtiniń normadan úsh ese kóp ekenin anyqtaǵan. Qoldan jasalǵan vıskı Túrkııaǵa Soltústik Kıprden jetkizilip, «Bırlyk Gyda» kompanııasy ony Ankara, Antalııa, Mýgle jáne Merısne qalalarynda saýdaǵa shyǵarypty. Túrkııada 12 myńǵa jýyq shólmek satylyp ta ketken kórinedi. Vıskıdi satýmen jasyryn fırmanyń aınalysqany da belgili bolyp otyr.
Sırııadaǵy daǵdarys shıelenisip tur
О́tken beısenbi kúni Rastan qalasynda úkimet áskerleri qarsylyq aksııasyna shyqqandardy tynyshtandyrmaq bolǵan ýaqytta kem degende on besteı adam qaza tapqan.
Bul jóninde sırııalyq azamattyq belsendiler málimdep otyr. Qalada ınternet, uıaly baılanys óshirilip, sý qubyrlary qańtarylyp, elektr qýatyn berý toqtatylǵan. Soldattardyń aıtarlyqtaı qatań áreketterge barǵanyna qaramastan, ázirge sherýler basylmaı otyr. Quqyq qorǵaýshylardyń málimetterinshe, sońǵy úsh kúnde ǵana 60 beıbit turǵyn oryn alǵan oqıǵalardyń qurbany bolǵan. Qarsylyq bildirýshiler burynǵysynsha el prezıdenti Bashar Asadtyń otstavkaǵa ketýin talap etýde.
Arsenalda bolǵan jarylys
Ýdmýrtııadaǵy qarý-jaraq arsenalynda oryn alǵan jarylystan eki adam qaza tapqan.
RIA Novostı agenttiginiń habarynsha, bul týraly respýblıkanyń densaýlyq saqtaý mınıstri Vladımır Mýzlov habarlaǵan kórinedi. Onyń aıtýynsha, adamdardyń qaıtys bolýyna jarylys áserinen týyndaǵan stressti jaǵdaı sebepker bolypty. Áli de jarylys jalǵasyp jatqan arsenal Ýdmýrtııanyń Malopýrgın aýdanyndaǵy Pýgachev selosynda ornalasqan. Qazirgi ýaqytta 45 adamnyń zardap shegip, 18 adamnyń aýrýhanaǵa túskeni belgili bolyp otyr. Bir adam iz-túzsiz joǵalyp ketken kórinedi.
Tornado tegeýrini
Amerıkanyń Massachýsets shtatynyń ústinen júrip ótken tornado saldarynan kem degende tórt adam qaza taýyp, 200 adam dene jaraqattaryn alǵan.
Alapat daýyldyń júrip ótken jolynda 18 qala men derevnıalar qatty búlinshilikke ushyraǵan kórinedi. Boston qalasynan batysqa qaraı 150 shaqyrym jerdegi 140 myńdaı turǵyny bar Sprıngfıld qalasy qatty zardap shekken. Tornado aǵashtardy túbirimen julyp alyp, keıbir úılerdiń irgetasy men qabyrǵalaryn da ushyryp áketken. Qazirgi kezde áskerıler men polıseıler qutqarý jumystaryn júrgizýde.
Ýlanǵan sýdan qaýip bar
«Fýkýsıma-1» apatty AES-te 100 myń tonnadan astam ýlanǵan sýdan turatyn kól jınaqtalyp qalǵan kórinedi.
Onyń quramyndaǵy radıoaktıvti zattar 720 myń terabekkerel dep baǵalanyp otyr. Eki apta ishinde osynaý ýlanǵan sýlardyń jerge sińip ketýi múmkin. Mamandarǵa radıoaktıvti sýdyń aǵynyn toqtatýdyń sáti túspeı turǵan kórinedi. «Fýkýsımanyń» tómengi meken-jaılary men tehnıkalyq qudyqtarynda barlyǵy 105 myń tonnadan astam radıoaktıvti sýlar jınaqtalyp qalǵan. Eger jańbyr jaýa berse 15 maýsymnyń ózinde-aq radıoaktıvti tasqynnyń syrtqa buzyp shyǵý qaýpi de joq emes.
Zeınetker prezıdent bolyp saılandy
Eldegi eń baı zeınetker Andrıs Berzınsh Latvııa prezıdenti bolyp saılandy.
Ekinshi týrda oǵan 53 depýtat óz daýystaryn bergen kórinedi. Osylaısha eldegi saıası daǵdarysqa núkte qoıylady degen úmit bar. Osydan bir apta buryn óziniń jeńiletinin bilgen Zatlers seımdi taratyp jibermek bolǵan edi. Biraq prezıdenttiń demokratııaǵa qaıshy dep sanalǵan áreketi Latvııada ǵana emes, sonymen birge odan tys jerlerde de synǵa ushyrady. Aqyrynda onyń óz josparynan bas tartyp, parlamenttiń qazirgi quramynda prezıdent saılaýyn ótkizýge kelisim berýine týra kelgen. Endi Zatlers depýtattardy taratyp jibermegenine ókinish bildiretin syńaıly.
Internet materıaldary negizinde ázirlendi.