«Eskimez Film Production Company» kompanııasynyń dırektory Kámil Kochtyń fılmografııasynda «Asfalt gúlderi», «Temir etik, temir taıaq», «Bizdiń aýyldyń áıelderi» kórkem fılmderi men «Túrik fılminiń ǵasyry», «Sońǵy kezeńdegi túrik fılmi» derekti fılmderi bar. «Qazaqfılm» kınostýdııasymen, jalpy, qazaq kınematografııasymen tanysý maqsatynda kelgen qonaqtardy «Qazaqfılm» kınostýdııasynyń prezıdenti Baqyt Qaıyrbekov qabyldady. Kezdesý barysynda Kámil Koch túrki halyqtary fılmderin túsirý men qarjylandyrýǵa baǵyttalǵan Qor qurý týraly usynys tastap, Qoja Ahmet Iаsaýı jaıynda fılm túsirýge qyzyǵýshylyq tanytatynyn jáne bul jobany «Qazaqfılmmen» birlesip iske asyrǵysy keletindigin aıtty. Baqyt Qaıyrbekov ulttyq kınostýdııa sheteldik stýdııalarmen birlesken jobalardy iske asyryp júrgendigin aıta kele: «Keleshekte túsiriletin mundaı fılmder ortaq tarıhymyzdan habar beredi. Kınostýdııanyń menshiginde Smaǵul Elýbaı jazǵan «Iаsaýı» atty daıyn ssenarıı de bar. Birlesip jumys jasaıtyn jaǵdaıda sizderdi avtormen tanystyramyz. Sondaı-aq, bizdiń fılmder Túrkııanyń kınofestıvaldaryna, atap aıtqanda, qonaǵymyz Kámil Koch myrza basqaratyn «Bosfor» festıvaline jylda qatysyp, júldemen oralatynyn aıtqym keledi», dedi.
Aınash ESALI, «Egemen Qazaqstan» ALMATY