2011 jylǵy 2 shilde, Astana, Úkimet Úıi
Temir jol vokzaldary qyzmetin uıymdastyrý qaǵıdasyn bekitý týraly
«Temir jol kóligi týraly» Qazaqstan Respýblıkasynyń 2001 jylǵy 8 jeltoqsandaǵy Zańynyń 14-baby 1-tarmaǵynyń 20) tarmaqshasyna sáıkes Qazaqstan Respýblıkasynyń Úkimeti qaýly etedi:
1. Qosa berilip otyrǵan temir jol vokzaldary qyzmetin uıymdastyrý qaǵıdasy bekitilsin.
2. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi.
Qazaqstan Respýblıkasynyń Premer-Mınıstri K.MÁSIMOV.
Qazaqstan Respýblıkasy Úkimetiniń
2011 jylǵy 2 shildedegi № 759 qaýlysymen bekitilgen
Temir jol vokzaldary qyzmetin uıymdastyrý qaǵıdasy
1. Jalpy erejeler
1. Temir jol vokzaldary qyzmetin uıymdastyrý qaǵıdasy (budan ári - Qaǵıda) «Temir jol kóligi týraly» Qazaqstan Respýblıkasynyń 2001 jylǵy 8 jeltoqsandaǵy Zańynyń 14-baby 1-tarmaǵynyń 20) tarmaqshasyna sáıkes ázirlendi, jolaýshylarǵa temir jol vokzaldarynda qaýipsiz jáne sapaly qyzmet kórsetýdi qamtamasyz etýge baǵyttalǵan Qazaqstan Respýblıkasynda temir jol vokzaldary qyzmetin uıymdastyrý tártibin belgileıdi.
2. Osy Qaǵıda Qazaqstan Respýblıkasynyń aýmaǵynda ornalasqan barlyq temir jol vokzaldaryna qoldanylady.
2. Temir jol vokzaldary qyzmetin uıymdastyrý
3. Temir jol vokzaldary tasymaldaý prosesiniń ajyramas bóligi bolyp tabylady jáne qyzmetin táýlik boıy júzege asyrady.
4. Temir jol vokzalynyń tehnologııalyq maqsaty jolaýshylardyń temir jol stansııalaryna kelýi jáne jóneltilýi kezinde olarǵa qaýipsiz, sapaly qyzmet kórsetilýin qamtamasyz etý jáne halyqqa qyzmetter kórsetý bolyp tabylady.
5. Temir jol vokzaldarynda bılet kassalary, kútýge arnalǵan úı-jaılar, sanıtarlyq-turmystyq úı-jaılar (dárethana bólmeleri) jáne aqparattyq qyzmet kórsetý obektileri (tablo, stendter, daýys zoraıtqysh baılanysy, anyqtamalyqtar), medısınalyq pýnkt, qoǵamdyq tártipti qorǵaý pýnkti bolýy tıis.
6. Jolaýshylar platformalary men perrondarǵa ótý jáne shyǵý múgedekter men halyqtyń baıaý qımyldaıtyn toptaryna qoljetimdi bolýǵa (pandýstarmen, mamandandyrylǵan lıftilermen jabdyqtalýǵa) tıis.
7. Temir jol vokzaldarynda jol júrý qujattaryn (bıletterdi) satýdy qamtamasyz etý úshin úı-jaılar usynýdy barlyq tasymaldaýshylar teń negizde júzege asyrady.
8. Temir jol vokzaldarynda medısınalyq pýnktterdiń bolýyn:
1) jeke nemese zańdy tulǵalar medısınalyq qyzmetter kórsetýge múddeli bolǵan kezde olarmen medısınalyq qyzmetter usyný jóninde sharttar jasasý arqyly;
2) vokzal ıeleri derbes qamtamasyz etedi.
9. Tasymaldaý prosesimen baılanysty anyqtama-aqparattyq qyzmetter turǵyndarǵa tegin kórsetiledi, atap aıtqanda:
1) aqparattyq stendter, tablo jáne t.b arqyly kózben sholý aqparaty arqyly:
- jolaýshylar poezynyń kelýi jáne júrýi týraly aqparat;
- jolaýshylar poezdarynyń júrý kestesi;
- jolaýshylar tasymalyn oryndaıtyn tasymaldaýshylar týraly málimet;
- temir jol vokzalyndaǵy jolaýshylardyń quqyqtary men mindetteri týraly aqparat.
2) aqparattyq qyzmet boıynsha aýyzsha jáne (nemese) radıotranslıasııalyq aqparat arqyly:
jolaýshylar poezynyń naqty kelý ýaqyty, júrýi jáne (nemese) bógelýi;
- jolaýshylar poezynyń beriletin jáne júretin joly týraly;
10. Aqyly negizinde qosymsha (servıstik) aqparattyq qyzmetter kórsetiledi:
1) kútip alatyn jáne shyǵaryp salatyn jolaýshylardyń ótinishi boıynsha daýys zoraıtqyshpen habarlandyrý;
2) tasymaldaýshylardyń qyzmeti jáne vokzalda ornalasqan kommersııalyq qurylymdardyń qyzmetteri týraly jarnamalyq sıpattaǵy habarlandyrý.
11. Qoǵamdyq tártipti qorǵaý pýnktterine arnalǵan úı-jaılar kommýnaldyq tólemderdi, baılanys tólemderin qospaǵanda, óteýsiz usynylady.
12. Temir jol vokzaldarynda:
1) vokzaldardyń, bos úı-jaılary tehnologııalyq múmkindikteri bolǵan jaǵdaıda kútý zaldarynda poezdyń kelýin kútý qamtamasyz etiledi;
2) jolaýshylarǵa qyzmet kórsetýmen jáne tasymaldaýmen baılanysty qyzmetter kórsetý úshin úı-jaılar usynýǵa ruqsat beriledi;
3) vokzal ǵımaratyna, perrondarǵa kiretin/shyǵatyn ótpelerdi, otyrǵyzý platformalaryn, jaıaý júrginshi kópirlerin, tósenishterdi, tonnelderdi qol júgimen, bagajben, basqa zattarmen bógeýge jol berilmeıdi;
4) vokzal aýmaǵynda 15 jasqa tolmaǵan adamdardyń eresekterdiń qaraýynsyz bolýyna jol berilmeıdi;
5) jolaýshylarǵa qyzmet kórsetýge arnalgan úı-jaılardy olarǵa qyzmet etýmen baılanysty emes maqsattar úshin paıdalanýǵa jol berilmeıdi;
6) medısınalyq pýnktter birinshi qabatta ornalastyrylady jáne perrondarǵa, vokzal mańyndaǵy alańdarǵa jáne jolaýshylardyń kútý zaldaryna erkin kirýge bolady;
7) vokzal perrondarynda pavılondar men dúńgirshekter ornalastyrý qamtamasyz etiledi.
13. Temir jol vokzalynyń ıesi jolaýshylarǵa jalpy paıdalanylatyn úı-jaılarǵa (aqyly qyzmetter kórsetýge arnalǵan úı-jaılardan basqa, foıege, kútý zaldaryna, kassa zalyna, jerasty ótpelerine, jolaýshylar platformalaryna (perrondarǵa), qoǵamdyq dárethanalarǵa jáne t.b.) aqysyz kirýdi qamtamasyz etedi.
Temir jol vokzalyn kútip-ustaýǵa baılanysty onyń ıesiniń shyǵystaryn tasymaldaýshy:
1) anyqtama-aqparattyq (ólshem birligi - qyzmet kórsetilgen jolaýshylar poezy);
2) aqyly qyzmetter kórsetýge arnalǵan úı-jaılardan basqa, tasymaldaý prosesin qamtamasyz etý maqsatynda paıdalanylatyn temir jol vokzalynyń alańdaryn usyný (ólshem birligi -jolaýshylar poezy) qyzmetterine aqy tóleý arqyly óteıdi.
Bul rette, osymen balanysty tasymaldaýshynyń shyǵyndary bılettiń qunyna engizý jolymen óteledi
14. Vokzaldardaǵy temir jol kóligi qyzmetkerleri jolaýshylardyń qaýipsizdigin qamtamasyz etýge, olarǵa qajetti qolaıly jaǵdaı jasaýǵa, mádenıetti túrde qyzmet kórsetýge, temir jol kóligi qyzmetterin paıdalanatyn barlyq adamdarmen qatynasta sypaıy jáne jaıdary bolýy jáne olardan qoldanystaǵy temir jol kóligi erejeleriniń oryndalýyn talap etýi tıis.
15. Temir jol vokzaldarynda jumystar júrgizý temir jol kóliginde qozǵalys qaýipsizdigin tómendetpeýi, temir jol kóligi qozǵalysynda úzilisterdiń týyndaýyna ákelmeýi tıis.
16. Temir jol vokzaldarynyń aýmaǵyna órtterdi, avarııalardy jáne basqa da dúleı apattardy joıý úshin órt sóndirý jáne avarııalyq-qutqarý komandalarynyń jaýyngerlik jasaqtary, jedel jáne shuǵyl medısınalyq kómek brıgadalary kedergisiz jiberiledi.
17. Vokzaldarda jolaýshylarǵa kórsetiletin shuǵyl medısınalyq kómek kórsetýdi qosa alǵanda, mindetti qyzmetter tizbesi Qazaqstan Respýblıkasynyń Úkimeti bekitetin Jolaýshylardy, júkti jáne júkbagajdy tasymaldaý qaǵıdasynda aıqyndalady.
18. Temir jol vokzaldarynda jolaýshylarǵa jáne turǵyndarǵa vokzaldardyń tehnologııalyq múmkindikterine baılanysty qyzmettiń qosymsha túrleri kórsetilýi múmkin.
19. Tasymaldaý prosesine qatysýshylarǵa qyzmetter kórsetý ótkizilgen konkýrstardyń qorytyndylary boıynsha temir jol vokzaldary ıelerimen jasasqan sharttar negizinde júrgiziledi.
Bul rette vokzaldardyń ıeleri men tasymaldaý prosesine qatysýshylar arasyndaǵy sharttar jasasý mynadaı qaǵıdattar negizge alyna otyryp, júzege asyrylady:
1) qyzmetterdi tutynýshylarǵa teń qoljetimdilik;
2) teń jaǵdaılar usyný;
3) qyzmetterdi jetkizýshilerdiń barlyǵyna qatysty biryńǵaı tarıftik saıasat júrgizý;
4) qyzmetterdi jetkizýshilerdiń jolaýshylar men poezdar qozǵalysynyń qaýipsizdigin qamtamasyz etý boıynsha talaptardy buljytpaı saqtaý.