Shymkenttiń «Ordabasy» fýtbol komandasyna jańa jattyqtyrýshy taǵaıyndaldy, dep habarlaıdy klýbtyń resmı saıty.
Ujymdy jańa maýsymǵa reseılik maman Alekseı Petrýshın daıyndaıdy. Ol buǵan deıin Qazaqstan premer-lıgasynda birneshe klýbty jattyqtyrǵan. «Qaırat» sońǵy ret el chempıony atanǵanynda klýb tizgini dál osy jattyqtyrýshynyń qolynda bolatyn. Sonymen qatar, 2014 jyly Semeıdiń «Spartak» komandasyna da jetekshilik etken.
Alekseı Petrýshın men «Ordabasy» arasyndaǵy kelisimsharttyń anyq-qanyǵy ázirge belgisiz. Qazirgi tańda ol komandany Túrkııadaǵy oqý-jattyǵý jıynynda jańa maýsymǵa daıyndaýda.
Petrýshın qazaqstandyq qos klýbtan bólek, Máskeý men Mınskiniń «Dınamosyn», Týlanyń «Arsenalyn», sondaı-aq «Shınnık», «Hımkı» jáne ózge komandalardy jattyqtyrǵan. Al fýtbolshylyq ǵumyrynda «Dınamo Máskeý» men «Pahtakor» klýbtarynyń namysyn qorǵaǵan.
Aıta keteıik, «Ordabasynyń» burynǵy bapkeri Bahtııar Baıseıitov qańtar aıynan bastap klýb prezıdenti qyzmetine saılandy.