Búgingi kúni Aqtóbe aımaǵynda qurylys-montaj jumystary keńinen qanat jaıyp keledi. Bıyl bul salaǵa qosymsha qarqyn qosý belgilengen. Sonyń ishinde jyl aıaǵyna deıin barlyq qarjylandyrý kózderi esebinen jalpy kólemi 650 myń sharshy metr turǵyn úıdi paıdalanýǵa berý josparlanǵan. Onyń birinshi kezegin Turǵyn úı qurylys-jınaq banki salymshylary qarajattary esebinen boı kóteretin nesıelik turǵyn úıler kesheni quraıdy. Sondaı-aq, bıyl óńirde «Jumyspen qamtýdyń jol kartasy-2020» baǵdarlamasyna sáıkes jaldamaly turǵyn úıler salý isine de basa kóńil bólingen. Al kommersııalyq maqsattaǵy turǵyn úı qurylystary bul baǵyttaǵy úshinshi kezekti quraıdy.
Onyń denin bıylǵy jyldyń tamyz aıyna deıin aıaqtaý uıǵarylǵan. Budan ózge bilim berý, densaýlyq saqtaý jáne mádenıet pen sport salalary boıynsha atqarylatyn qurylys jumystary da aýqymdy. Munyń bári eń aldymen sáýlet úlgilerine jáne aldyn ala jasalǵan qurylys jobalaryna sáıkes kelý kerektigi talas týǵyzbaıdy. Joǵaryda atalǵan qurylys jumystarynyń basym bóligi oblys ortalyǵynyń úlesine tıedi. Aqtóbe jyl saıyn ósip-órkendep, ajary atqan tańdaı ashylyp kele jatqan shyraıly shahar. Búgingi maqsat onyń turǵyndarynyń sanyn tabıǵı jáne ishki kóshi-qon esebinen ósirý bolyp otyr. Bul áleýmettik-demografııalyq mindettiń iske asýyna qurylys jumystarynyń da tıgizetin oń áseri bar.
Bıylǵy jyldyń basy Aqtóbe qalasyna óziniń taǵy bir jaqsylyǵyn ala keldi. Aqtóbe qalasynyń bas jospary qaıtadan jańǵyrtylyp, Úkimet qaýlysymen bekitilýi aldyńǵy pikirimizdiń aıǵaǵy. Endeshe, respýblıkanyń batys óńirindegi iri de irgeli qalada turǵyzylatyn san alýan nysandar bas jospar bastaýynan tamyr tartyp jatsa ıgi. Bul rette respýblıkamyzdaǵy qala ákimderiniń qaýlysymen qurylatyn sáýlet, qala qurylysy keńesteriniń tıgizetin septigi men kómegi de kóp bolmaq. Ras, «Sáýlet, qurylys jáne qala qurylysy týraly» zańda mundaı sıpattaǵy keńester qurý qarastyrylmaǵan. Áıtse de, qala qurylysyna qatysy bar túıindi máselelerdi ózara keńesip ári aqyldasa otyryp, tıisti organdarǵa usynys ázirleý atalǵan keńes qyzmetiniń basty paryzy bolyp tabylady. Álbette, keńesip pishken ton kelte bolmaıdy emes pe?!
Áıtse de, Aqtóbe qalasynda qala qurylysy keńesiniń qyzmeti eshqandaı syn kótermeıdi desek, shyndyqtan alshaq kete qoımaspyz. Sońǵy ýaqytta onyń jumysyna sylbyrlyq pen selqostyq, enjarlyq jáne birsaryndylyq pen jattandylyq tán bolyp júrgeni de eshkimge qupııa emes. Aqtóbe qalasynyń ákimi Ilııas Ispanov qala qurylysy keńesiniń quramyna birinshi kezekte kánigi ári kásibı mamandardy, sáýletshiler men jobalaýshylardy tartýǵa kóńil bólgende sóz joq, mundaı quramdaǵy keńes músheleri qurylystyń basty ári negizgi taraptary boıynsha turǵyzylýyna oń yqpalyn tıgize alatynyna eshqandaı kúmán da bolmas edi.
Búginde ne kóp, ártúrli baǵyttaǵy qurylys nysandaryna tapsyrys berýshiler kóp. Biz muny aıtqanda olardy kópsinip otyrǵanymyz joq. Bul árıne, ıgi nyshan. Buǵan qýanýymyz jáne qoldaýymyz kerek. Áıtse de, olardyń jasaǵan jobalaý-smetalyq qujattary men saraptamalarynyń bári birdeı minsiz bolyp kele bermeıtini ókinishti. Eger munda negizgi nysan men qosalqy qurylystarǵa qoıylatyn talaptar eskerilmese, sóıtip oǵan salǵyrt qaraýdyń saldarynan bul qujattar bekitilip kete berse erteń onyń sońy úlken ókinishke uryndyrmasyna kim kepil? Qala qurylysy keńesi músheleri usynys-pikirleriniń qajettiligi men ózektiligi de osynda. Aqtóbe qalasynda osyndaı syndarly sátte keńes qyzmetiniń qojyrap, is-qımyldyń nasharlap ketýin nemen túsindirýge bolady? Jaýapsyzdyq pa, salǵyrttyq pa? Áıtse de, kóńilge bir medeý tutarlyq jaıt, muny Aqtóbe qalasynyń ákimi Ilııas Ispanovtyń ózi de moıyndap otyr. Endeshe, ol aldaǵy ýaqytta keńes qyzmetine jańa serpin berýge yqpal jasaıtynyna sengimiz keledi. Qala qurylysy keńesi óz ataýynan kórinip turǵanyndaı, keńesshi organ. Sondyqtan da bireýlerge nusqaý berý, qısyq ketkenderdi tártipke shaqyrý quzyryna kirmeıdi. Degenmen, ortaq is oraıynda olardan oıly usynys-pikirler túsip jatsa, ony olja emes dep aıta alar ma ekenbiz.
Temir QUSAIYN, «Egemen Qazaqstan»
AQTО́BE