Búginde «elektrondyq úkimet» ınfraqurylymy arqyly 761 elektrondyq qyzmet júzege asyrylýda – bul egov veb-portalynyń 240 elektrondyq qyzmeti, elektrondyq ruqsat etilim boıynsha 86 qyzmeti túri men 435 elektrondyq sheshimniń berilýi. Bul týraly Aqparat jáne kommýnıkasııa mınıstri Dáýren Abaev Aqparat jáne kommýnıkasııa mınıstrliginiń keńeıtilgen otyrysynda aıtty.
«2016 jyly portal arqyly 41 mln qyzmet túri júzege asyryldy. Sonymen qatar, mobıldik qosymsha arqyly da jumystar iske asyrylýda. Qazirgi tańda atalmysh formatta qyzmettiń 83 túri bar. «Azamattarǵa arnalǵan úkimet» memkorporasııasy biryńǵaı qoljetimdilik núktesi arqyly qyzmettiń 77 paıyzyn usynyp otyr. 2016 jyly Memlekettik korporasııa 36 mln qyzmet túrin usyndy», - dedi D.Abaev.
Sonymen qatar mınıstr ótken aıda Birikkken Arab Ámirliginiń Úkimeti egov.kz mobıldik qosymshasyn «Úzdik mobıldik úkimet qyzmeti» syılyǵyna usynǵanyn aıtty.
«Joǵarǵy sapa jáne memlekettik qyzmettiń qarapaıymdylyǵy mınıstrlik maqsatynyń basym baǵyty bolyp tabylady», - dedi D.Abaev.