Atyraý oblysyna jumys sapary barysynda Memleket basshysy Nursultan Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Qazaqstan halqyna Joldaýyn túsindirý jáne nasıhattaý maqsatymen Májilis depýtattary Jambyl Ahmetbekov, Nurlan Dýlatbekov jáne Gennadıı Shıpovskıh Isataı aýdanynyń Tushyqudyq jáne Aqqystaý aýyldaryna keldi.
Tushyqudyq aýylyndaǵy saılaýshylarmen kezdesýdi aýdan ákimi Turarbek Sultanbekov ashyp, júrgizip otyrdy. Májilis depýtaty Jambyl Ahmetbekov Elbasynyń Joldaýyndaǵy negizgi baǵyttar týraly aıta kelip, osy baǵdarlamalyq qujat elimizdiń kelesi damý belesin baǵyndyratyndyǵyna senim mol ekendigin aıtty.
– Elimizdiń damyǵan 30 eldiń qataryna qosylýy úshin Joldaýda aıtylǵan ınnovasııany, sıfrly tehnologııany, IT tehnologııany, ǵylym jetistikterin, bir sózben aıtqanda, álemdik ozyq tehnologııany óndiriske engizýmiz qajet, ıaǵnı eldiń ekonomıkasynyń múlde jańa modelin damytý sharty tur. Elbasy Joldaýynyń negizgi taqyryby, mine, osy máselelerdi qamtıdy. Halyqty áleýmettik qorǵaý máselesi de Joldaýdyń basty baǵyty, – dep atap ótti J.Ahmetbekov.
Halyq qalaýlylary saılaýshylardyń kóptegen suraqtaryna jaýap berdi. Kezdesýge aýyl turǵyndary, memlekettik kásiporyndar men bıznes ókilderi, aqsaqaldar men aýdan belsendileri qatysty.
Baqytgúl BABASh,
«Egemen Qazaqstan»
Atyraý oblysy