«Qazanat» atshabarynda uıymdastyrylǵan osynaý mańyzdy sharany Aqparat jáne kommýnıkasııalar mınıstri Dáýren Abaev, Mádenıet jáne sport mınıstri Arystanbek Muhamedıuly, Majarstannyń Qazaqstandaǵy Tótenshe jáne ókiletti elshisi Andrash Baranı sııaqty saıası tulǵalar da kóppen birge tamashalady. Qazaq-madııar mádenı baılanysynyń negizin qalaǵan qaıratker-ǵalym Ishtvan Qońyrdyń málim etýi boıynsha, madııarlardyń atajurty – Qazaqstan. Shamamen V-VI ǵasyrlarda ataqty Edil patsha qurǵan Batys Ǵun memleketi qojyraǵan tusta Arpad bastaǵan dalalyqtardyń jeti taıpasy qazirgi majar jerine kelip qonystanǵan. Sondyqtan da madııarlar baıyrǵy atajurtyn ańsaıdy, myńdaǵan jyldar buryn babalarynyń izi qalǵan uly dalany kelip kórmese kóńilderi kónshimeıdi. Sóıtip, baıyrǵy babalar rýhyn kóterý úshin syrnaılatyp-kerneıletip atqa qonǵan madııar baýyrlar ǵundar zamanyndaǵy qylyshtasý ónerin kórermenge usyna otyryp, sadaq atýdyń ártúrli úlgisin kórsetti. Aldymen tizerlep otyryp sadaq tartty. Odan keıin attyń ústinde aınala shaýyp júrip nysana kózdeýden sheberlikterin baıqatty. Súreń salyp dúrkireı shapqan mergenderdiń adyrnadan atylyp shyqqan oqtary múlt ketken joq. Astanaǵa madııarlardy basqaryp kelgen «Madııar – Turan qorynyń» prezıdenti, keshe ǵana bas súıegi tabylǵan Keıki batyrdyń beınesin qalpyna keltirgen antropolog Bıro Androsh myrzanyń aıtýyna qaraǵanda, bul sapardyń basqa da alǵa qoıǵan maqsattary barshylyq. Áýeli, osydan 10 jyl buryn Torǵaı ólkesinde ótken qazaq-madııar aǵaıyndardyń alǵashqy quryltaıynyń dataly merekesin atap ótý úshin aldaǵy kúnderi Qostanaı oblysy, Jangeldın aýdany jerinde naqtyraq aıtqanda, Saǵa, Qyzbel, Bıdaıyq aýyldarynda qosymsha mádenı sharalar uıymdastyrylyp, Y.Altynsarın atyndaǵy Arqalyq memlekettik pedagogıkalyq ınstıtýtynda úlken ǵylymı konferensııa ótkizbekshi.
Beken QAIRATULY, «Egemen Qazaqstan»