Elimizdiń Ulttyq sport túrleri qaýymdastyǵy ókilderiniń aıtýynsha, búginde óńirlerde shógen oınaıtyn shaǵyn komandalar bar. Aldaǵy ýaqytta solardyń basyn biriktirip, at sportynyń osy túrin damytý josparda tur. «shógen sportynan elordada ótken bul kezdesý alǵash ret uıymdastyryldy. Matchqa ár komandadaǵy 3 oıynshydan barlyǵy 6 sportshy qatysty. Oıyn 3 bólimnen turady, al ár bólimi 7 mınýtty quraıdy. Oıynǵa qatysqan jylqylardyń barlyǵy ózimizdiki», deıdi shógennen Qaraǵandy qalalyq qaýymdastyǵy basshysy Aslanbek Meshkov. Mamannyń aıtýynsha, Argentınada bul oıyn birneshe myńdyq stadıondar jınaıdy. Qazaqstanda da damýy tıis, sebebi qazaqtar ejelden jylqyny qasterleıdi. Argentınalyqtar da bul janýardy joǵary baǵalaıdy.
Elimizde argentınalyq jylqy tuqymyn býdandastyrý josparda bar kórinedi. Onyń ortasha baǵasy 10 myń eýrodan bastalady eken. «Kókpar-Astana» jylqy sporty klýby» JShS dırektory Amanjol Hasenov qazirdiń ózinde kez kelgen adam qalasa klýbqa kelip, shógenniń seksııasyna tegin qatysa alatynyn aıtty. «Onda kókpar oınaıtyn 10 shabandoz daıyndyq ústinde. Kókpar oınaǵandar shógen oıynyn tez úırenip alady. Onyń tehnıkasyn meńgerýge ári ketkende 2-3 aı ǵana ýaqyt qajet. Balalar 11-15 jastan bastap oınasa, 60-70 jastaǵy qarııalar da sporttyń bul túrimen aınalysa alady», deıdi A.Hasenov.
«Oıyn keremet ótti, barlyǵy joǵary deńgeıde uıymdastyrylǵan. Mundaǵy attar kókparǵa mashyqtanǵan. Biraq at sporty bolǵandyqtan, qazaqstandyqtar shógendi tez meńgerip alady dep oılaımyn. Sondyqtan ózderin álemdik deńgeıde kórsetýlerine múmkindikteri mol. Al biz tájirıbe almasýǵa árqashan ázirmiz», deıdi argentınalyq komandanyń oıynshysy Fernando Shvaıser. Oıyndy tamashalaýǵa Aqparat jáne kommýnıkasııalar mınıstri Dáýren Abaev, Argentınanyń BAQ jáne qoǵamdyq pikir mınıstri Ernar Lombardı jáne basqa da laýazymdy tulǵalary keldi.