Táýelsizdik bastaýy – Jeltoqsan

Qazaqstan Respýblıkasynyń 20 jyldyǵy men Jeltoqsan kóterilisiniń 25 jyldyǵyna oraı Qazaqstannyń «Aq jol» demokratııalyq partııasy 1986 jyly alańǵa shyǵyp, kóterilistiń zardabyn tartqan jeltoqsan jastaryn qoldaý týraly usynys kóterdi. Qazaqstannyń «Aq jol» demokratııa­lyq partııasy Jeltoqsan kóterilisiniń 25 jyldyǵyn laıyqty atap ótý jónindegi Qoǵamdyq komıtet otyrysynda jeltoq­san kóterilisine qatysqan azamattarǵa qoǵamdyq kólikte tegin júrý múmkindigin qarastyratyn bastama kóterip, Almaty qalasynda qoǵam qaıratkerleri men memlekettik avtokólik tasymaldaý kom­panııa­larynyń basshylarymen dóńgelek ústel otyrysyn ótkizdi. Jazýshy Smaǵul Elýbaı, Qazaqstan Tarıhshylar qaýymdastyǵynyń tóraǵasy Mámbet Qoıgeldıev, «Ádilet» tarıhı aǵar­tý ortalyǵynyń jetekshisi Beıbit Qoı­shybaev, «Uly Dala» qozǵalysynyń je­tekshisi, saıasatker Aıdos Sarym, «Ult taǵdyry» qozǵalysynyń jetekshisi Dos Kóshim, «Jeltoqsan aqıqaty» gazetiniń bas redaktory Amanǵazy Káribjanáýleti, «Bolashaq» jastar qozǵalysynyń jetekshisi Dáýren Babamuratov, «Jas qazaq úni» gazetiniń bas redaktory Qazybek Isa sekildi birqatar qoǵam qaıratkerleri bas qosqan jıynda «Jeltoqsan kóterilisine qatysqan azamattardyń kóbi úlken qıyndyqtarǵa tap bolyp, biri túrmege qamalyp, biri jumystan qýylǵandyǵyn, bilim alyp jatqan oqý oryndarynan shy­ǵarylyp, talaı bozbala men boıjet­ken­niń ómirine balta shabylǵandyǵyn jáne ómir­den óz ornyn taýyp, múmkindikterin júzege asyrýǵa jaǵdaılary bolmaı, áleý­mettik ahýalyn jaqsarta almaı kúızel­gen­digin, bú­gingi Táýelsizdigimiz úshin za­mandasta­ry­myz óz bolashaqtaryn qurban etkendigin» atap ótip, otyrys barysynda «Aq joldyń» kóshbasshysy Azat Perýashev búgingi basqosýdyń maqsaty saıası qadam emes, ult tarıhyn ulyqtaý ekendigin basa aıtty. Partııanyń bul bastamasyn Atyraý, Qyzylorda, Almaty, Shyǵys Qazaqstan, Qaraǵandy, Jambyl oblystary men Astana jáne Almaty qalalyq avtopark bas­shy­lary úlken yqylaspen qabyl aldy. Bul usynysty azamattyq paryz dep qa­byl­daǵan avtopark basshylary tipti qo­ǵam­dyq kólikte tegin júrý úshin jaltoq­sanshylarǵa arnaıy jol júrý bıletterin uzaq merzimge berýge yqylasty ekendikterin jetkizdi. Qaraǵandy oblysynyń ta­symaldaý qyzmeti «TTS» JShS-niń dı­rek­tory M.Berqalıev Qoǵamdyq komı­tet­tiń qurylǵanyna rızalyǵyn bildirip, osy uıymnyń jumysyna shyn nıetpen at­saly­satyndyǵyn aıtty. Otyrys bary­syn­da Qoǵamdyq komıtet pen Qazaq­stannyń «Aq jol» demokratııalyq par­tııasy jáne avtoparkter arasynda kelisimge qol qoıyldy. Osy qujattyń negizinde avtoparkter qoǵamdyq komıtet bekitken tizim boıynsha jeltoqsanshylarǵa qoǵamdyq kólikterde tegin júrýi úshin arnaıy bıletter daıyndap, jaqyn kúnderde tabys ete bastaıdy. Budan ózge osy otyrysta Jeltoqsan kóterilisiniń 25 jyldyǵyn laıyqty atap ótý maqsatynda elimizdiń barlyq qala­la­ry men aýdandarynda Jeltoqsan kóteri­li­si taqyrybynda arnaýly is-sharalar uıymdas­ty­rylyp, qala kóshelerine ar­naý­ly bılbordtar ilinetin bolady. Son­daı-aq, qoǵam­dyq uıymdar men qoǵam qaı­ratkerleriniń usynýy boıynsha jel­toq­sanǵa qatysqan jáne qýǵyn-súrginge tap bolǵan azamattarǵa memlekettik dá­re­jede arnaýly marapat taǵaıyndaý usy­ny­sy da qabyldandy. Jeltoqsan kóterilisiniń 25 jyl­dy­ǵyn laıyqty atap ótý jónindegi Qoǵam­dyq komıtet Qazaqstannyń «Aq jol» demokratııalyq partııasynyń uıytqy bolýymen 2001 jyldyń 14 qyrkúıeginde qurylyp, onyń tóraǵasy bolyp belgili qoǵam qaıratkeri, jazýshy ári jeltoqsan taqyrybyn zertteýshi ǵalym Smaǵul Elýbaı biraýyzdan saılanǵan bolatyn. Qanat ESKENDIR. Almaty.