Taldyqorǵan – tatýlyqtyń mekeni

Almaty oblysynyń ortalyǵynda Qala kúni merekesi atalyp ótti Birneshe jyldan beri ót­ki­zi­lip kele jatqan, osylaısha bú­gin­de ıgi dástúrge aınalyp ketken aýdan-qalalardyń  máde­nıet kúnderin Taldyqorǵan qa­la­synyń jurtshylyǵy qory­tyn­dylady. El Táýelsizdiginiń 20 jyldyǵy qurmetine ótki­zil­gen osynaý saltanatqa  qala­daǵy barsha bilim oshaqtary men óner ujymdary, mekemeler men kásiporyn qyzmetkerleri, Tal­dy­qorǵan áskerı garnızonynyń jaýyngerleri qatysty. Bul kúni Taldyqorǵan jurt­shylyǵy qosarlanǵan qýanysh­tyń kýási  boldy. Naqtyraq aıtar bolsaq, merekege oraılasa halyqaralyq standartqa saı salynǵan úlken tennıs korty paıdalanýǵa berildi. Saltanatty sharany oblys ákimi Ańsar Musahanov ashyp, jurtshylyqty jańa sport ny­sa­nynyń ashylýymen quttyqtady. Oblys basshysynyń sózinen keıin erkin kúresten Atlanta Olımpıadasynyń kúmis júl­degeri Máýlen Mamyrov oblys aýmaǵynda sportqa aıryqsha nazar aýdarylatyndyǵyn aıtyp, oblys basshylyǵyna degen rızashylyǵyn bildirdi. Tennıs ortalyǵynyń len­tasyn qıǵannan keıin  ájeleri­miz qazaqtyń salt-dástúri bo­ıynsha shashý shashty. Sodan keıingi kezekte kópshilik úlken tennısten arnaıy uıym­das­tyrylǵan jarysty tamashalady. Aýmaǵy 13864 sharshy metrdi alyp jatqan tennıs ortalyǵynda  bir mezette on eki adam tennıs oınaı alady, al kórermenge arnalǵan orynǵa úsh júz adam syıady. Ortalyq alańda uıym­dastyrylǵan «Taldyqorǵan keshe jáne búgin» taqyrybyna arnal­ǵan kórme de mazmundylyǵymen kóz tartady. Jetisýdyń jaýhar qalasynyń ótkeni men búgingi jaǵdaıynan mol maǵlumat beretin kórmeni turǵyndar men qala qonaqtary qyzyǵa tamashalady. Taldyqorǵanda áldeneshe on­daǵan ulttyń ókilderi tatý-tátti tirlik keshýde. Soǵan oraı bul kúni orys, uıǵyr, nemis, grek, polıak, qytaı, kúrd mádenı orta­lyqtary ulttyq taǵamdary men qolóner buıymdarynan kórme jasap, ónerleri men salt-dás­túrlerinen úzindi kórsetti. Áskerı tehnıkanyń kórmesi de kópshiliktiń erekshe nazaryn aý­dardy. Buǵan, ásirese, bal­dyr­­ǵandar máz boldy. Otan úshin qurban bolǵan bozdaq­tardyń rýhyna arnap jaǵyl­ǵan «Máń­gilik alaýǵa» gúl shoq­taryn qoıý, tal otyrǵyzý rásimine de oryn berilip, ob­lys ákimi Ańsar Tur­synhan­uly saıabaqqa óz qolymen kók­jelek otyrǵyzdy. Saıabaq­tyń ajaryn Taldy­qorǵan kór­kem­sýret mektebi túlekteriniń shy­ǵarmashylyq izdenisinen týǵan sýret týyndylary asha tústi. Merekeniń kóńildi ótýine qala mektepteri men balalar­dyń shyǵarmashylyq ortalyq­tary­nyń ujymdary da ózindik úles­terin qosty. Ortalyq saıa­baqta ótken asfaltta sýret salý ja­rysynda el Táýelsizdiginiń 20 jyldyǵy men Qala kúnine ar­nalǵan balalardyń júrek­jar­dy tilegi boıaý tilimen órildi. Taldyqorǵan qalasynyń ákimi Mahabbat Bıgeldıev bolsa qalanyń áleýmettik-ekono­mı­­kalyq damýyna erekshe eń­begi sińgen birneshe turǵynǵa «Tal­dyqorǵan qalasynyń Qur­metti azamaty» tósbelgisin tap­syrdy. Taldyqorǵan jurtshylyǵy men qonaqtary osy stadıonda halqymyzdyń ótken tarıhynan syr shertetin teatrlandyrylǵan qoıylymdy tamashalady. Kúmisjan BAIJAN. Almaty oblysy.