Jyl basynan beri Qazaqstan ekonomıkasynyń ósimi 4,3 paıyzdy qurady. Bul týraly búgin Úkimet otyrysynda QR Ulttyq ekonomıka birinshi vıse-mınıstri Rýslan Dálenov málim etti, dep habarlaıdy QazAqparat.
«Ekonomıkalyq ósý shildedegi azǵana tómendeýden (4,0%) keıin aldyn ala baǵalaý boıynsha aǵymdaǵy jylǵy 8 aıda 4,3 paıyzǵa deıin jedeldedi. Syrtqy saýda 30 paıyzǵa jýyq ósti, ınflıasııa báseńdep, nysanaly dáliz sheginde tur. Osynyń aıasynda Moody's jáne S&P reıtıngtik agenttikteri táýelsiz nesıelik reıtıngtik boljamyn teris kórsetkishten turaqty kórsetkishke jaqsartty», - dedi R.Dálenov 2017 jylǵy qańtar-tamyzdaǵy áleýmettik-ekonomıkalyq damýdyń qorytyndysyna qatysty baıandamasynda.
Onyń sózine qaraǵanda, ekonomıkanyń shıkizat emes segmentindegi oń ózgerister baıqaldy. Máselen, shıkizat emes sektor salymy nyǵaıǵan, ol 2,3 paıyzdyq tarmaqty qurasa, al shıkizat segmentiniń salymy 1,6 paıyzdyq tarmaqty qurady.
Vıse-mınıstrdiń atap ótýinshe, ósýdiń joǵary serpini alty bazalyq salanyń tórteýi boıynsha (ónerkásip, saýda, kólik jáne qoımalaý, aqparat jáne baılanys) baıqalýda, ósý qarqynynyń báseńdeýi qurylysta jáne aýyl sharýashylyǵynda oryn aldy.
Budan bólek, óńirlik bóliniste óńirlerdiń kópshiliginde negizgi kórsetkishter boıynsha oń ósý serpini baıqalyp otyr. Máselen, aýyl sharýashylyǵynda barlyq óńirlerde 0,3%-dan 5,6%-ǵa deıin ósý boldy.
«Sonymen qatar Mańǵystaý jáne Qyzylorda oblystary boıynsha ónerkásipte jáne qurylysta tómendeý tirkeldi. Qaraǵandy jáne Almaty oblystary boıynsha qurylysta jáne negizgi kapıtalǵa salynǵan ınvestısııalarda tómendeý oryn alyp otyr», - dep toqtaldy ol.
Munymen qosa, Soltústik Qazaqstan men Shyǵys Qazaqstan oblystarynda tek bir-bir kórsetkish boıynsha tómendeý ǵana baıqalyp otyr, tıisinshe qurylysta - 8,6%-ǵa jáne negizgi kapıtalǵa salynǵan ınvestısııalarda - 7,2%-ǵa tómendegen.