Almaty oblysy, Sarqan aýdany, Birlik aýyly dinı merekeler men juma namazyn Sarqanǵa baryp óteıtin. Sebebi, aýylda meshit joq. Qabyrǵaǵa batatyn-aq jaǵdaı. Sońǵy kúnder – birliktikter úshin bul máseleniń sheshimin tabýymen este qalǵany daýsyz. Endi bul aýylda meshit bar! «Bereke-Birlik» meshitiniń irgetasyn qalap, aıshyǵyn qadap, munarasyn tiktegen – aýyl azamattary.
Tórt munaraly meshitti salýǵa aýyl bolyp atsalysypty. Dızaın, kórkemdeý turǵysyndaǵy ıdeıalar kóp jaǵdaıda el bolyp aqyldasyp sheshilgenin aıtady jurt. Dinniń maqsaty – iritki salý úshin emes, uıytý, uıystyrý ekenin eskersek, Birlik aýylyndaǵy bul Qudaı úıi aýyldyń aýyzbirshiliginen týǵan, endi jamaǵattyń baýyrmaldyǵy úshin qyzmet etetin bolady.
Ekinshi meshit aýdan ortalyǵy Sarqan qalasynda boı kóterdi. Qalada osyǵan deıin bir ǵana meshit bolǵan. Demek, bul da el tilegi turǵyzǵan kıeli ǵımarat. Bul ǵıbadat úıi de el azamattarynyń birigýimen, qoldaýymen salynǵan. Qurylysy 4 jyl buryn bastalǵan sáýletti, eńseli ǵımarat endigide Qudaı degen janǵa qushaǵyn ashatyn, ár mereke, ár juma saıyn eldiń basy qosylatyn ordaǵa aınalady.
Meshitterdiń ashylý saltanaty da úlken kólemde, jalpyhalyqtyq mereke deńgeıinde atalyp ótti. Bas múftı Erjan qajy Malǵajyuly, Astanadaǵy «Hazret Sultan» meshitiniń Bas ımamy, naıb múftı Serikbaı Oraz, Sarqan aýdanynyń Bas ımamy Serikbol Asqar, aýdan ákimi Erǵazy Qoshanbekov bastap, aýyl, aýdan turǵyndary men ár óńirden kelgen qonaqtardyń qatysýymen bolǵan merekede meshitterde ıne shanyshar oryn bolǵan joq. Alǵashqy ashylýyn qasıetti kúnge týralap, jıylǵan jurtpen birge juma namazyn oqyǵan bas múftı elimizde ashylǵan ár meshittiń orny bólek ekenin, dinı basqarma úshin ǵana emes, búkil el úshin, Memleketimiz úshin zor qýanysh ekenin aıtty.
Sondaı-aq, meshit – tek ǵıbadat orny ǵana emes, aýyldyń sáni ekeni sózsiz. Sondyqtan da aıshyqty úıdiń sáýleti de tartymdy bolý keregine den qoıý kerek. Aıtalyq, Birlik aýylyndaǵy bir jarym gektar jerdi alyp jatqan meshittiń aınalasy kógaldandyrylyp, aldaǵy ýaqytta, tipti, balalar oınaıtyn alań salýdy josparlap otyr. Bul – jańa bastama deýge bolady. Din men halyqty jaqyndatý, jasósipirimderdiń jat aǵymdarǵa ilesip ketpeýine yqpal etýdiń birden bir joly da osy bolsa kerek.
Basqa emes, meshittiń alańynda júrgenin umytpaı, aýyzdaryn baǵyp, bylapyt sóz aıtýdan saqtana oınap júrgen búldirshinder keledi kóz aldyńa. Almas NÚSIP, «Egemen Qazaqstan»
Almaty oblysy