Eńbek jáne halyqty áleýmettik qorǵaý mınıstrliginiń jumysyn sıfrlandyrýda birqatar jetistik bar. Bul týraly búgin Úkimettiń selektorlyq rejimdegi otyrysynda QR Aqparat jáne kommýnıkasııalar mınıstri Dáýren Abaev aıtty, dep habarlaıdy QazAqparat.
«Búgingi kúni Memleket basshysynyń tapsyrmasyna saı «Sıfrlyq Qazaqstan» memlekettik baǵdarlamasy jan-jaqty ázirlenip jatqany belgili. Ekonomıkanyń básekege qabilettiligin arttyrýǵa baǵyttalǵan osy irgeli bastamanyń aıasynda aldymyzda kóptegen mindetter tur. Osy oraıda Eńbek jáne halyqty áleýmettik qorǵaý mınıstrligine arhıtektýra ázirleý barysynda mınıstrliktegi negizgi máseleler aıqyndalyp, avtomattandyrýǵa jol ashatyn strategııalyq mańyzdy baǵyttar naqtylandy», - dedi ol.
Sonymen qatar Dáýren Abaev Eńbek jáne halyqty áleýmettik qorǵaý mınıstrliginiń aqparattyq júıe men aqparattyq kommýnıkasııalyq ınfraqurylymnyń negizgi jaǵdaıy saraptalyp, olardy ońtaılandyrý men damytý boıynsha mańyzdy usynystar berilgenin basa aıtty.
«Mınıstrlik jumysynda bul baǵytta birqatar jetistik bar ekenin atap aıtý kerek. Ol: qaıtalatyn aqparattyq júıelerdi biriktirý, olarǵa arnalǵan shyǵyndardy ońtaılandyrý máseleleri. Sondaı-aq mınıstrliktiń jergilikti atqarýshy organdarmen aqparattyq is-qımylynda qosarlanǵan sharalardyń joq ekendigin atap aıtqan jón. Osy turǵyda maqsatty jobalardyń arhıtektýrasy men jol kartasy ázirlendi. Sonyń ishinde mańyzdysy - elektrondy eńbek bırjasyn damytý, áleýmettik mártebeler men áleýmettik kómekti esepke alýdyń biryńǵaı júıesi, qyzmetkerlerdiń profılin júrgizý jáne eńbek sharttaryn esepke alý júıesin qurý, proaktıvti áleýmettik qyzmetter kórsetý úshin ómirsheń jaǵdaılar júıesin esepke alý. Osy arhıtektýranyń jobasy sarapshylyq keńeske tanystyrylyp, kelisildi»,- dedi mınıstr.
Aıta keteıik, búgin Úkimet otyrysynda Eńbek jáne halyqty áleýmettik qorǵaý mınıstri Tamara Dúısenova áleýmettik-eńbek salasyn sıfrlandyrý jaıynda baıandama jasaǵan bolatyn.